唔經唔覺踏入年尾，英國天氣明顯開始轉涼，甚至開始有點凍，喺英國展開chapter2生活，其中一樣要適應嘅係四季天氣溫度變化。事實上每年10月開始，英格蘭地區溫度會開始降至攝氏廿度以下，去到11月會進一步降至徘徊喺十二、十三度，12月起至1月和2月，唔少時間溫度更加會喺得幾度添。要好好咁度過冬天，除咗著夠衫之外，亦要記住某啲重點，例如點樣保持室內溫度或者對付落雪。
Table of Contents
NHS教你如何Stay Well
英國提供緊急救護服務嘅National Health Service(NHS)，不時對居民嘅健康作出適當嘅建議。NHS其中一篇叫「How to Stay Well in Winter」，提醒大家過冬要留意嘅事項，特別係65歲以上人士，以及有長期病患者例如心臟病、糖尿病、哮喘患者要多加留意，除咗因為容易冷親感冒外，亦因為低溫容易引發高血壓、急性心臟狷和中風，後果可大可小。
「keep warm」和「keep active」
咁究竟喺英國過冬有咩貼士，總結嚟講，第一個就係「keep warm」。喺自己屋企室內，最好可以保持攝氏18度嘅室溫，方法當然係要有良好運作嘅central heating system中央供暖系統，若果發現有異樣，請盡快聯絡Gas Engineer檢查一下，合資格嘅人士可以喺呢個網頁https://www.gassaferegister.co.uk/ 搵到。如果中央供暖系統真係有問題，而又唔能夠及時維修好，可以考慮吓買電暖爐頂住先。另外亦要關好屋企嘅窗，特別喺睡房床邊以及浴室，建議喺長期關閉，有需要時先開一陣通通風，之後記得閂返。
除咗keep warm，亦要「keep active」。冬天室外天氣凍，好多時都留喺屋企，呢個時間應該好好利用喺英國比較大嘅屋企地方，唔好成日坐喺度睇書、睇電視或者玩電腦，得閒可以由屋頭行到屋尾，有兩層嘅不妨上落樓梯，甚至上網跟住短片做吓瑜珈或者健身。如果有花園嘅話，亦可以出去做吓園藝當做活動一下，好處係如果覺得太凍，可以即時返返入屋。Keep active除咗有助keep warm，亦可以減少患慢性病甚至抑鬱症添。
檢查藥箱
喺chapter2生活踏入冬季，最好檢查家中藥箱，係咪有齊急緊情況下需要嘅非處方藥物。當然究竟需要咩藥物，視乎家庭成員健康情況而定，所以請諮詢醫生或藥劑師嘅建議。一般嚟講，某啲非處方成藥已經能紓緩常見冬季疾病的症狀，例如感冒、發燒、鼻竇炎等，所以最好準備定喺屋企。不過如果有任何嚴重嘅唔舒服徵狀，可以打電話號碼「111」。若果你有睇過我哋另一篇文章《英國的「999」vs「111」》https://hkersuklife.co.uk/07/08/2021/before-you-go-to-uk/4757/ ，或者會記得打「111」電話號碼，會由受過專業訓練的人士會負責接聽，並由護士和藥劑師喺背後支援，對方會詳細問及你嘅身體狀況和病徵，提供可行的協助。即使你想去醫院急症室，出發前亦可以考慮先打電話「111」，因為佢會幫你通知急症室你可能到達嘅時間，等佢哋有所準備，你去到輪候時間亦有可能縮短。但如果有更嚴重即有生命危險嘅情況，就唔好猶豫打「999」。
屋企室外通道積雪應盡快清理
另一樣chapter2朋友喺冬天會遇到而又唔熟悉嘅情況，就係落雪。喺英國呢個咁潮濕嘅地方，冬天12月至2月落雨係不時會發生嘅事，但要小心嘅係有積雪或半融成冰嘅地面，係非常之滑，所以最好準備定為落雪而設嘅防滑鞋。屋企門口或室外通道，如果有積雪，情況許可就應該盡快清理，因為如果雪開始融，氣溫又再下降，有機會變成冰面，到時更加滑，清理又更加難。以下係一啲清理積雪嘅貼士：
- 越早清理越好，鬆散嘅雪較易被剷走
- 不要使用水，因為會重新凍結變成冰面
- 如果可以，喺雪上灑上鹽，會令雪融化或阻止它重新結冰。
- 如果您無鹽，您可以灑上泥沙子，會令到無咁冼，但留意可能會污漕啲。
- 清理樓梯級或台斜路時要格外注意。
今次講住咁多先，希望chapter2朋友喺冬天stay well！