我就鐘意食燒味

家在英倫，得逢愛妻下廚，烹調金香燒肉，略抒鄉愁。吾，不勝歡喜。

英國新生活之家鄉燒肉

 人在異地，難免會思鄉，尤其大時大節。所以間中食下啲香港特式嘢一解思鄉之情都係好正常，食咩可以一解思鄉之情人人唔同，有人鍾意食點心，你可能係魚蛋，我就鐘意食燒味。

難得老婆大人唔怕麻煩肯整燒肉畀我食，一解思鄉情懷。絕對表揚老婆大人，無唸過來到英國生活都可以食到咁香脆嘅家鄉燒肉。而家同大家分享下整燒肉嘅過程，而要準備嘅嘢都唔係太難搵到。

 

材料

• PORK BELLY 一舊大約約 0.5KG （大部分英國超市都有得買，今次就係 Sainbury’s 買）
• 紹興酒 1/3 湯匙 （英國超市都有得買）
• 粗鹽 適量
• 幼鹽 2 茶匙
• 砂糖 1 茶匙
• 五香粉 1/3 茶匙 （有些英超有CHINESE FIVE SPICE，如果搵唔到，一般中超都有得賣既）。

烹調步驟

1. 第一步就係要舊豬肉洗乾淨之後汆水，煲到大約7成熟到喇，就可以撈起，用廚房紙吸乾水份。
2. 之後有個步驟好重要，就係搵針係咁拮個豬皮，哩個步驟係影響你整出嚟舊燒肉爆唔爆到皮變脆皮，拮完記住反轉底面，用刀界幾下，咁就容易啲入味。
3. 之後除左豬皮既地方，勻均咁搽啲調味去醃舊豬肉，用錫紙將豬肉包好，淨係唔駛包住豬皮，會幫助佢風乾啲。醃佢一晚。
4. 第二日就可以放焗爐喇，預熱180℃焗佢45分鐘。（因應自己買個舊豬嘅大細適當調整時間），最後5分鐘較高至220℃焗等佢再爆多啲皮再脆啲，之後就係坐定定等食。

P.S. 提提大家，如果大家屋企個廚房有煙霧感應器嘅話，麻煩大家緊記開爐之前開定啲窗。記得開窗，開窗，開窗。（因為好重要所以要講三次）。因為開爐個下係會勁大煙，如果個Alarm響就麻煩了。