Table of Contents
英格蘭無山好行 ?
講起英國高山，大部分人會諗起蘇格蘭，一來全英國最高嘅十個山峰都係位於蘇格蘭，包括最高嘅Ben Nevis(1345米)，二來蘇格蘭Highland嘅山脈奇景的確聞名於世，連荷里活大片都要喺度取景，不過咁絕對唔代表英格蘭就無行山嘅好去處。英格蘭大部分地方都屬於低地，山地主要集中喺西北地區，區內有英格蘭最高嘅山峰Scafell Pike，高987米，即係比大帽山只係高大約30米。雖然英格蘭嘅山唔係高聳入雲，但千祈唔好睇少，因為好多座山幅員比較廣闊，好多風景都非常壯麗和明媚，登頂難度唔高，唔需要極度專業嘅裝備，對大部分chapter2朋友想喺英國行山，地點亦比較近，揸車都可以去到。
英格蘭山地集中西北部
想認識英格蘭最正嘅行山地點，要記住呢兩個地方名，Yorkshire Dales和Lake District，都係位於英格蘭西北部。英格蘭大部分最正嘅行山地點，都可以話喺哂呢兩個西北地區入面，佢同時都分別係國家公園，即係話有哂設施例如停車場、指示牌、休息地點、旅館等等。如果想要多啲資訊，可以分別去到呢兩個國家公園Lake District National Park https://www.lakedistrict.gov.uk/ 和Yorkshire Dales National Park https://www.yorkshiredales.org.uk/ 嘅官網。
8個英格蘭西北部行山熱點
Helvellyn, Lake District (950米)
(圖1- Striding Edge)
呢個山高950米，係英格蘭第三高嘅山鋒，據說在山頂可以睇到由威爾斯伸延至蘇格蘭嘅景色。Helvellyn最出名嘅地方喺佢嘅登山路徑，其中一段叫「Striding Edge」，沿住長長嘅山脊不斷上上落落，而路徑嘅兩邊係陡峭嘅山坡，部分路段會有點窄，都幾驚險架，所以要著對合適嘅行山鞋。
Scafell Pike, Lake District (987米)
(圖2- 英格蘭最高山峰Scafell Pike的日落)
作為英格蘭最高和最大嘅山，佢嘅高度有987米，望到景觀亦係最廣，遠至北愛爾蘭，山勢唔算險要，可以由山峰嘅東南西北方上山，好多條路線可以出發攻頂，大部分難度都唔算高，其中最短嘅路徑由山頂西面嘅Wasdale Head出發，呢度位於海拔80米，有足夠攀升距離，享受行山樂趣，而同Scafell Pike山頂直線距離只有3公里多啲，距離唔算遠。
Old Man of Coniston, Lake District (802米)
(圖3- Old Man of Coniston有野生綿羊)
呢個係一個非常有趣嘅行山地點，亦好受歡迎，沿途可以欣賞到曾被開採咗800年，已經廢棄嘅礦場，亦有好多野生綿羊，佢哋基本上唔係好怕人，有啲仲夠膽埋嚟問你攞野食添。去到頂峰會見到由石頭堆起砌成，高過一個人嘅石堆，英文叫cairn，通常用來做標記和紀念，可以話打卡一流。呢個山高約802米。
Great Gable, Lake District (899米)
(圖4 – Great Gable外形似金字塔)
Gable係指建築物有兩邊打斜屋頂，喺側邊形成嘅中間尖起嚟垂直外牆，呢個山得到呢個名當然係因為佢似一個大gable，亦有人話佢似金字塔，簡單嚟講好似一個三角形啦。佢嘅頂峰高899米，由於山嘅外形令到登頂難度算係比較高，部分路線更係攀石嘅熱點，不過亦有可以行路上山嘅路徑，路程唔過5公里。
Buckden Pike, Yorkshire Dales (702米)
講咗幾個Lake District嘅山，轉講吓Yorkshire Dales嘅山啦。呢個山上有唔少紀念二戰嘅標記，包括山頂一個十字架，紀念第二次世界大戰時，5名喺英國皇家空軍服役嘅波蘭人，駕駛轟炸機墜毀英勇犧牲嘅事蹟。事實上喺第二次世界大戰，波蘭係最早被德軍征服嘅地方之一，有大約1.8萬名成功逃難嘅波蘭人，去到英國為皇家空軍效力，喺英國好多地方都有Polish War Memorial嘅紀念碑或庭園等，登上呢個山可以認識一吓呢段歷史。
Ingleborough, Yorkshire Dales (723米)
(圖5 – Ingleborough附近的White Scars)
呢個山有兩個賣點，第一個係登山途徑可以見到嘅「White Scars」，一塊塊裂開咗嘅岩石鋪滿地下，好似一個個方格，又好似乾到裂開咗嘅泥土，形成非常有趣嘅路面，影相一流。呢一個賣點係佢嘅山頂，可以見到鐵器時代遺留落嚟嘅建築物遺蹟。
Whernside, Yorkshire Dales (736米)
(圖6 – Ribblehead Viaduct)
呢個山有一個相對平而闊嘅山頂，山勢唔算險要，反而比較宏偉。不過最吸引嘅景點，喺佢附近嘅「Ribblehead Viaduct」，一條有24個拱形橋墩嘅橋，上面喺俾火車行嘅路軌，長約400米，高約32米，始建於1870年，足足用咗四年完工，可以話係當時人類智慧嘅結晶，至今仍然屹立不倒。如果去到條橋前面「打個卡」，肯定得到好多like。
Pen-y-ghent, Yorkshire Dales (694米)
(圖7 – Hull Pot)
呢座山同上面介紹過嘅Ingleborough和Whernside，合稱Yorkshire’s Three Peaks，好多行人愛好者會一次過挑戰呢三個山峰。Pen-y-ghent雖然係Three Peaks入面最矮嘅山，但佢獨特嘅地理環境令佢吸引登山客方面，一啲都唔輸蝕，講緊嘅係佢附近有一啲水流經過嘅岩洞，包括Hunt Pot和Hull Pot，情況就好似一條河突然穿咗個窿，水流入地底，形成奇觀，有興趣仲可以參加團搵導遊帶你落去岩洞參觀添。
行山緊記量力而為
最後老套都要講句，行山必須量力而為，出發前做好資料搜集，了解路線長短和體力要求，而且要準備好安全措施應該突發事件，並了解天氣預告。如果評估後擔心未能應付，可以考慮吓唔使上山登頂，其實有時喺周邊位置，反而有利欣賞整座大山嘅壯麗，好好喺chapter2享受行山樂趣。