除左聖誕節，英國4日長假期就只有復活節，傳統英式有咩食有咩玩? 等我地同大家介紹啦!
Table of Contents
復活節有幾多日假放?
之前有文章講過英國公眾假期只有八日，當中除咗第一大節 – 聖誕節佔咗兩日之外，復活節都算係佔咗2日，包括復活節前嘅一個星期五(Good Friday)及之後第一個星期一(Easter Monday)，亦係2021年英國除咗聖誕節嘅唯二嘅四日長假期(如果你星期六日休息的話)。雖然今年無得趁長假期去旅行，不過都可以先了解下英國復活節嘅傳統，為下年作好準備。
英國復活節傳統食物
首先要介紹嘅係食物，其中一種傳統食物就係歌都有得唱嘅Hot Cross Buns，依個包味道甜甜，材料有香料、黑加侖子或葡萄乾等等，包上面會有個十字嘅符號，係象徵耶穌受難嘅十字架。
第二樣食物就係Simnel cake，蛋糕主要材料有杏仁同埋水果，蛋糕面上通常會裝飾11或12個小杏仁餅球代表耶穌12或11門徒(without猶大)。曾經一度息微，不過喺知名烘焙師重新包裝後，幾年受歡迎程度慢慢上升。
英國復活節合家歡活動
講完食物就介紹活動，活動除咗基本嘅Easter egg hunt👀同埋畫復活蛋之外，仲有Egg Rolling比賽，而當中最出名嘅就係喺Avenham & Miller Parks, Preston, Lancashire舉行嘅活動。依個活動除左有蛋碌，仲有工作坊及現場表演🤹♂️等等，下年如果可以舉行的話係好適合一家大細參與。同時係Bacup, Lancashire仲有一個傳統跳舞表演💃 – The Britannia Coco-nut Dancers舉行，同Avenham & Miller Parks相距約45分鐘車程，如果順路都不妨去埋，了解一下礦工的舞蹈。
充滿Power的復活節活動 – Bottle-kicking
講完啲文靜嘅活動，就講番一個Crazy嘅活動。係Hallaton, Leicestershire每一年都有個叫做Bottle-kicking嘅活動。依個活動嘅起因係喺200年前，隔離村(Medbourne)偷走咗Hallaton嘅酒桶，係! 你冇睇錯，係酒桶唔係bottle，我都唔知點解叫Bottle-kicking，之後Hallaton人Call行馬去番Medbourne搶番啲酒桶，結果變成兩條村年年嘅對抗賽，今時今日依然係依2條村對壘。
其實Bottle-kicking係有一系列活動，包括9:30am 就有遊行叫醒啲村民，10am就有扯大纜比賽，11am就舉行教堂禮拜，之後到1:45pm有個叫野兔批遊行(Hare Pie parade)，之後一群人就浩浩蕩蕩出發去Bottle-kicking比賽場地。
Bottle-kicking除咗唔可以用武器，基本上係冇規則而言，戰況可以參考以下Youtube，同Cheese Rolling一樣，受傷扭親斷骨簡直係家常便飯，所以都會有救護車Standby。賽制係三盤兩勝，比賽場地比一條小河圍繞，要勝出比賽只要將酒桶帶去自己條村就算贏。當地人話現代欖球比賽(Rugby)都係參考佢地而發展出黎，真相係點就無從考究喇，不過參加活動，盡興就好!
其實英國復活節傳統活動仲有Maypole Dancing、Morris Dancing、Egg jarping、Jack in the Green等，有興趣不妨上網Search下。雖然今年因為疫情關係全部都無得舉行，而家知定先下年就可以好好計劃復活節行程。
其他關於英國假期的文章: