物件寄到英國先發現無用? 其實可以上網賣左佢。英國網上二手交易網站 Preloved
英國#斷捨離— Preloved
大家都知道係英國掉垃圾係有成本的，所以大家都盡可能減少製造垃圾。英國人推崇環保，一般嚟講，啲嘢仲用到佢哋都唔會掉，真係無用或者真係無地方擺，唔少人會選擇放上二手網站賣咗佢又或者捐左佢。
有幾箱家當無咩用，食之無味棄之可惜點算好? 原來英國都有2手交易平台
大家寄家當移民過嚟英國嘅時候，好有可能唔理3721都寄咗先，三四十箱真係閒閒地，等咗個幾2個月收到嘅時候，先發現原來係無乜用或者等唔切已經係當地買咗，曾經係唔知邊個Group睇過，有個人朋友屋企有3個雪櫃，問佢點解啦，點知係因為當時由香港船運咗2個雪櫃去英國，結果當然係等唔切要買多一個啦，結果就有3個雪櫃係屋企喇。掉咗多出黎嘅物件又好似好浪費，如果係咁大家倒不如「斷．捨．離」，善用英國網上二手物品買賣平台，今日就為大家介紹其中一個二手物品買賣網站+App — Preloved。
Preloved用法 留意物件位置
佢用法基本同香港某拍賣app差唔多，開個Acc，揀好你要賣嘢嘅Categories，之後放相同簡單描述下件物品（又係練習英文嘅時間），就可以出Post賣嘢。同其他二手物品買賣網一樣，你可以賣嘢嘅同時你都可以徵（Wanted）想要嘅野，不過根據我買賣二手物品嘅經驗，徵求物品不如真接自己Search 下有無自己想要嘅嘢仲快。提一提大家，大家買嘢嘅時候記得睇下賣家嘅位置，如果你住London，賣家係曼城，隨時油錢＋時間你買件新嘅仲化算。
哩個網站仲有一Part 叫Freeloved嘅版面，佢係畀大家Free啲物品走，如果大家有啲舊物覺得唔值錢，掉咗佢又覺得浪費，不妨影幅相放上去送俾人畀人，來到英國生活，可以的話，睇下遇唔遇到有需要幫助嘅人。
Preloved 嘅Personal Account分咗3️種(圖3)，Free、Full (£5) 同 Premium (£20)，一般嘅二手買賣Free Member已經足夠；另外佢仲有 Business account(圖4)，即係話大家可以係Preloved正規咁做生意，不過Business Account 就一定要課金💲，如果大家做小生意又想搵多個平台嘅話，Preloved都可以畀多個選擇大家。
圖3
圖4
傳送門: Preloved
Screen Shot Photos Credit: Preloved
作者：小關公