如果有一齣戲，同時能夠為移民英國展開chapter2生活嘅朋友，振奮人心和勉勵意志，亦能夠令人認識英國傳統家庭倫理、歷史事件、社會結構以至生活文化，呢齣戲肯定係《Billy Elliot》《跳出我天地》。
呢齣戲由Stephen Daldry執導(佢近期電影作品有2014年嘅《Trash》《垃圾男孩》)，喺2000年上映，獲英國獨立電影獎「最佳電影」、「最佳導演」、「最佳編劇」、「最佳新人」獎項，喺奧斯卡獲三項提名，分別為「最佳導演」、「最佳原創劇本」和「最佳女配角」，2004年被《Total Film》雜誌選為最偉大英國電影第39位，之後被改編成舞台音樂劇，亦被讚譽為「英國最偉大的音樂劇」。事實上，好多英國人都認為《Billy Elliot》《跳出我天地》係英國史上最成功嘅電影之一，所以話chapter2朋友實在唔應該錯過呢齣戲。
Table of Contents
《Biily Elliot》 – 從現實生活絕境走到充滿希望未來
《Billy Elliot》《跳出我天地》故事發生喺1984年，位於英格蘭東北部Durham縣一個海邊小鎮Easington，主角Billy Elliot只有12歲，母親離世，與父親哥哥嫲嫲同住，當時正值英國礦工大罷工，主角父親哥哥係參與罷工嘅工人。主角父親一直希望Billy學習拳擊，但Billy係體育中心學拳擊，接觸到旁邊嘅芭蕾舞班，對舞蹈發生濃烈興趣，芭蕾舞班老師見佢有潛質，義務教佢跳舞，父親知道後激烈反對，但睇到個仔嘅天份後就立即接受，最後仲支持佢成功考入皇家芭蕾舞學院添。
呢齣戲令人最印象深刻，可以話係主角由最初充滿絕望，到後來漸漸見到光明，到最後仿如重生的故事發展。雖然反差好大，但劇情推展順暢絕不突兀。當你睇頭大半個鐘會以為係一齣悲劇，睇睇吓夾雜住一啲英式幽默，又類似一齣喜劇，到描述父子兄弟關係，又會感到係一齣家庭倫理劇，睇到結局完完全全感受到，實際上係一齣勵志劇。
《Billy Elliot》《跳出我天地》告訴你的英國一二事
1984-85年煤礦工人大罷工
當時英國煤礦業由一個國有企業領導，得到國家巨額資助，當局計劃關閉一部分盈利能力低，甚至虧損的煤礦，令全國礦工工會醞釀發起罷工。結果喺1984年3月，英國各地工會開始罷工，全英國尤其是北部，亦即《Billy Elliot》故事發生嘅地區，罷工情況特別嚴重。工會希望透過罷工，令到社會電力供應短缺，打擊整體經濟，居民冬天缺乏供暖，對英國政府造成壓力，以停止或減少關閉煤礦，或提高礦工離職補償。不過鑑於之前已經有應對罷工經驗，戴卓爾夫人領導的英國政府早做好準備，預先貯儲好煤炭備用、發電廠改用其他燃料等，令到罷工影響大大降低。加上罷工引發的衝突，尤其是罷工工人與不願罷工工人之間的對抗越來越激烈，甚至造成人命傷亡，《Billy Elliot》中亦有呢啲衝突場面，結果到1985年初，罷工陸續結束，呢場罷工對大部分英國人都係深刻回憶。
排屋與獨立屋
英國的住屋可分為幾類，當中包括獨立屋(Detached House)，半獨立屋(Semi-Detached House)、排屋(Terraced House)和公寓(Apartment)。排屋並無花園或停車位，通常只有一個後園(Yard)，可以話係英國最大眾化嘅住所類型，《Billy Elliot》主角一家就住喺排屋入面，其中一幕主角哥哥因示威俾警察追要逃走，前門入後門出咁穿過多間其他人住嘅排屋，睇到好多英國典型屋企嘅間隔和物件，實在非常有趣。至於戲中教主角跳舞嘅芭蕾舞老師，家境比較好住喺獨立屋，主角和主角爸爸都分別曾經上門搵佢，經過隔離屋都會俾人哋養嘅狗吠，嚇到彈出馬路，令人會心微笑。
英國家庭文化
《Billy Elliot》主角父親喺戲初令人害怕，飲酒(典型英國人)、古肅(只准主角學打拳)、暴躁(連阿媽都鬧)、暴力(曾經揮拳大仔面)，絕無任何討好嘅地方。但套戲完場後，會覺得佢內裡係一個好爸爸，只係不懂表達，有着典型英國人嘅內斂，卻又感情豐富，而且非常著重家庭嘅普遍特質。其中一幕佢為咗讓一家人冬天取暖，喺後院忍痛地將老婆遺物 – 一個大鋼琴打碎，將琴木放入火爐燒，令一家人溫暖；又有一幕佢第一次見到主角表演跳舞，見到主角天份後，立即跑去原本鬧翻咗嘅芭蕾舞老師屋企，放下身段問佢點樣可以幫個仔考入皇家芭蕾舞學院；又一幕佢為咗賺錢作為個仔考皇家芭蕾舞學院費用，居然放棄尊嚴唔再罷工，應徵返入礦場開工，俾當初一齊罷工嘅戰友發現，跪地痛哭。
《Billy Elliot》有個完滿結局，睇完令人認識到無論當下係如何逆境，但一家人團結一齊，未來總係光明。Chapter2朋友，加油！
Billy Elliot 亦曾經登上舞台，成為非常歡迎的Musical，雖然最近沒有公演，如果大家有興趣都可以係Amazon重溫。