去到一個新地方 – 英國生活，想快啲融入社會，認識你嘅鄰居同社區會係最好方法之一。香港嘅朋友未必習慣同鄰居太親近，但係喺英國其實鄰里關係一般都係唔錯嘅。疫情期間雖然未必有機會直接同鄰居打招呼或者怕羞都唔緊要，哩個時候Mobile App – Nextdoor就幫到你。
Table of Contents
Nextdoor係乜嘢嚟？
你可以當佢係一個左鄰右里版嘅Facebook，佢喺Google Play Store已經有超過1000萬下載，而係Apple App Store就有超過10萬個評論，可想而知係有幾Popular。
同Facebook唔同，Facebook著重連繫你嘅家人朋友，Nextdoor則係連繫你嘅左鄰右里。Nextdoor採用實名制登記帳戶，注册時用家需要填寫真實姓名同真實地址，Nextdoor仲會要求登記人開定位去驗證你嘅位置是否同你填寫嘅地址是否一樣，或者將個驗證碼用Postcard寄到你填寫嘅地址嚟驗證你嘅住址。嚴謹嘅驗證制度是為了打造一個真實嘅社區社交網絡。
接收最貼近自己社區資訊
由於你接收嘅都你當地社區嘅訊息，基本上可以當佢係一個電子版嘅社區公告欄。大家都會將自己社區發生嘅事放上去，最常見可能係有咩罪案發生，尋找失物，亦有人會分享當日遇嘅唔同事，最重要同時可以了解當地人對唔同事件嘅睇法。以下例子就係屋企上網發生問題，係Nextdoor一問，先知原來係網絡供應商嘅問題，仲有其他鄰居同你一齊中招。
有鄰居做你嘅盲公竹
去到一個陌生嘅地方，如果你屋企爆水渠、廁所塞咗、唔記得帶鎖匙，Nextdoot就係一個平台畀你向住係附近嘅當地人求救，總比你向Facebook向全世界求救嚟得更實際，試想想，當你冬天屋企個Boiler有問題，有咩援助好得過發現個同區有師傅可以幫到手？
社區互助
有時當見到可疑人物係自己社區出現，大家都會選擇係Nextdoor發布訊息提醒附近居民要多加留意，鄰里間嘅互相提點，亦有助改善社區嘅治安。
在自己社區中創業及尋找商機
係Nextdoor嘅社區網絡入面，除咗會見到鄰居們尋找不同嘅人專業人士幫手之外，都會有唔同人發布訊息比大家知自己有咩專長，即係在Nextdoor上尋找生意。如果大家都有一技之長，都不妨試試係Nextdoor上發布同你嘅鄰居分享下，話唔定會有意想不到嘅效果。(但要留意你自己嘅專長於英國收錢提供服務嘅時候是否需要考取特定資格)
二手物品買賣
除了之前介紹過嘅Perloved (https://bit.ly/3c94rVI) 之外，其實Nextdoor 都可以畀大家買賣家中嘅二手物品，數量同品種當然不及Perloved多，但多一個渠道接收或幫助清理家中無用物品也無壞，需知道係英國掉垃圾並唔係咁簡單。
俗語都有話，遠親不如近鄰，之前我哋亦有租客因為之前入伙有同鄰居打過招呼，而之後獲得鄰居嘅幫助，今日人地幫咗，下次就到你幫返人，關係就係咁慢慢建築起來。