申請BNO Visa交左IHS費用，黎到英國有Council地址證明之後梗係第一時間登記GP，如果你有小朋友係4歲以下，你就有機會收到兒童服務 Healthier Together 寄比你的信，內容會係同你約時間做NHS家訪。咁究竟實際黎到你屋企會做咩呢?
Table of Contents
來自NHS的信件
係收到NHS成功登記GP 封信過左幾日後就收到由NHS Healthy Together 的家訪信。信內主要都係約時間，如果NHS提議的時間你唔得閒，建議你盡快跟信中指示打電話去改期。而編輯K就係家訪日子前2星期左右收到NHS電話來double confirm時間。
NHS的家訪內容
編輯K朋友2020年底來到英國時，都有收到依封信要進行家訪，不過當時COVID-19疫情嚴重，最後家訪改左做電話訪問就完結，而編輯K今次係真家訪。護士姨姨好準時黎到，全身著哂保護裝備。招呼左佢坐低之後，護士姨姨就拎左一本類似香港母嬰健康院提供的兒童健康紀錄手冊的紅色簿仔出來，一開始會核對父母身份資料，之後就問家庭病歷紀錄，即係有冇地中海貧血、心臟病、食物敏感等等。
檢查成長狀況
完成後護士姨姨會查詢小朋友成長狀況，包括牙齒、是否可以自行飲食、是否需要著尿片、手指肌肉能力及跳躍能力等等。護士姨姨特別提到如果四歲仲未戒片，可以去紅色簿仔上面嘅有關網站去查詢戒尿片的方法，再唔係打電話都可以。另外亦提醒編輯K住的區域自來水中沒有加入氟化物(fluoride)，所以在選擇小朋友牙膏時需要留意氟化物含量要超過1000ppm，而由於當時仲用緊香港帶嚟得500ppm嘅牙膏，護士姨姨幫編輯K睇過之後就建議我哋盡快更換喇。
向護士姨姨請教
而且剛好編輯K寶貝女身上起風癩，但係未知因咩事而引起敏感，所以順便問埋護士姨姨點處理，護士姨姨就推介咗一隻叫Piriton嘅藥水，只要有任何輕微敏感症狀，都可以服用呢隻藥水，喺各大藥房都可以買到，當然嚴重的話就要睇GP或去醫院了(Touchwood)。
成長預測
接住落黎就係同小朋友度高同埋磅重，有一樣比較特別嘅就係護士姨姨幫編輯K填好寶貝女身高體重資料後，原來係可以預測到佢未來嘅高度的。
填寫針卡資料
大家可能喺登記gp時都有填過, 不過由於咁多專業名詞而且同香港打既針未必完全一樣，大家填果時可能都係估下估下，但係護士姨姨就問我哋攞咗針卡幫編輯K填番有關資料。專業人士填完仲會簽個名添，咁就放心唔會錯啦!
介紹NHS兒童成長網站
護士姨姨她完成所有檢查之後，亦有向編輯K介紹NHS Health for Under 5s – 有關5歲以下兒童成長嘅網站，如果有興趣，大家可以去睇睇 – https://healthforunder5s.co.uk/
總結
整個過程大概三十分鐘左右，咁編輯K喺護士姨姨離開之前就問佢下次家訪會係幾時，護士姨姨表示因為寶貝女嚟緊四歲，檢查將會由Reception提供，所以唔會再有任何家訪，如果關於小朋友成長有任何問題就可以向GP查詢。
雖然護士姨姨家訪的測試好簡單，亦同香港去母嬰健康院檢查內容相約，但係英國係安排護士上門，而唔需要去醫院或母嬰健康院等檢查，實在係十分貼心的服務，而且護士姨姨亦都比左唔少資訊比編輯K。第時你有小朋友後比NHS家訪時，如果有任何疑問就要好好把握問下護士姨姨喇!
兒童相關文章: