我哋介紹過8個英格蘭西北部嘅行山熱點，唔少chapter2朋友睇到已經話覺得正，有時間一定會去。我哋帶完大家「上天」，之後梗係要帶埋大家「下海」，介紹英格蘭最正嘅海灘俾大家。講到歐洲海灘，好多人未必會諗起英國海灘，但英國有長長嘅海岸線，點會無靚海灘呢，有唔少嘅優質程度，可以媲美希臘、葡萄牙或者意大利出名海灘，只不過可能以前認識英國，主要靠旅遊宣傳，而英國旅遊賣點實在太多，先忽略咗英國海灘有幾咁正！
有睇過我哋介紹英格蘭行山熱點嘅文章，或者會記得我哋講過，英格蘭山地主要集中嘅西北地區，英格蘭海灘就唔同嘞，英格蘭海岸線長達幾千公里，海灘有成幾百個，無話集中喺東南西北邊一區，不過多數人去玩樂嘅海灘，都集中喺西南邊和南邊，事關英格蘭唔同地區海灘其中一個最大分別，在於南邊和西南邊，天氣比較熱和海水比較吉和暖，適合游水或海邊活動嘅季節都比較長、東邊和東北邊海灘長啲時間比較涼，一年比較多啲月份只係適宜吹吹海風踩吓沙。不過有一樣嘢好緊要，就係水質，我哋介紹得嘅，都一定得到官方環境部門認證，水質屬最佳級別。以下介紹8個最正嘅英格蘭海灘。
Table of Contents
1. Fistral Beach
圖1 – https://www.visitcornwall.com/beaches/lifeguards-seasonal/north-coast/newquay/fistral-beach
Fistral Beach位於英格蘭西南部，水清沙幼，設有救生服務，係寧靜嘅海外桃源。鄰近小鎮Newquay，有唔少海邊酒吧和餐廳，亦有多間酒店適合嚟個短trip住返幾日。要留意Fistral Beach被譽英格蘭最正嘅滑浪海灘，周末定必吸引眾多滑浪愛好者，但亦換言之浪比較大，未必完全適合在海中暢泳嘅朋友。
2. Bournemouth
圖2
Bournemouth般尼茅夫位於英格蘭南部，海灘連綿長達11公里，沙質柔軟，最適宜日光浴。由於地理位置關係，Bournemouth海灘擁有全英國最溫暖嘅水域，一年有較長時間適合碧波暢遊，海灘有唔少海上活動中心，提供獨木舟、立漿划板設置，附近更有高空滑索和攀岩等活動，同樣係住返幾日幾夜嘅好去處。
3. Brighton Beach
圖3
Brighton Beach同樣位於英格蘭南部，與Bournemouth相距唔算太遠，海灘無Bournemouth咁長，但都有成接近9公里。Brighton曾經被選為10大海邊旅遊地點，有幾正相信唔使多講，賣點之一肯定係佢有個歷史猶久嘅Brighton Pier，上面海邊主題公園，機動遊戲啱哂小朋友，另外呢度嘅發展歷史猶久，有好多維多利亞時代嘅景點，亦有開業於1864年嘅酒店Grand Hotel、英國最古老嘅電動鐵路Volks Railway等等，令你旅程更加豐富。
4. Bigbury-on-Sea
圖4 – https://www.visitsouthdevon.co.uk/things-to-do/bigbury-on-sea-beach-p232883
Bigbury-on-Sea Beach位於英格蘭西南部，被官方評為Area of Outstanding Natural Beauty，佢嘅賣點係自然景觀，沙灘兩邊都係連接住個海，有個非常大面積嘅淺水區，隨住潮漲潮退，露出水面嘅沙灘大細會有所唔同，但即使最潮漲嘅時候，都唔會蓋過成個沙灘，穿過沙灘可以去到一個類似海中心嘅島，上面有一間酒店。
5. Blackpool Beach
圖5
講起英格蘭海灘，不得不提Blackpool，佢灘上舖滿嘅主要係細石，唔係水清沙幼果種海灘，唔係最適合海上活動。佢最出名之處在於佢嘅Blackpool Pier，有主題樂園Pleasure Beach，入面有過山車摩天輪，附近又要觀光塔Blackpool Tower，呢度更有好多酒吧夜店，晚晚又有歌舞表演又有party，人人玩通宵，簡直係海邊刺激體驗。
6. Ventnor Beach (Isle of Wight)
圖6
Isle of Wight係英格蘭南邊嘅一個島嶼，海岸線大約80公里，上面有成17個極度優質嘅海灘，去完一個只需要步行就可以去到另一個，絕對啱哂真正嘅海灘發燒友。17個海灘之中，好多人認為Ventnor為首選，水清沙幼唔使講，旁邊已經有商舖和遊樂設施，海邊更有維多利亞時代嘅酒店和民宿，可以由朝到晚聽住海浪聲。
7. Porthcurno Beach
圖7
Porthcurno Beach位於英格蘭西南部，附近雖然都有餐廳商店旅館，但同上面介紹嘅海灘比較，算係比較遠離小鎮。Porthcurno Beach吸引之處在於沙灘上嘅風景，兩邊係高高嘅懸崖，前面係一望無際嘅大海，加上人比較少，真正令人有遠離煩囂嘅感覺。駕車前往Porthcurno Beach，可以停泊喺懸崖頂嘅停車場。但要留意呢度水域受風、潮汐漲退和水流要影響比較大，所以游水要比較小心。
8. Whitby Beach
圖8
同上面介紹過多數位於南邊嘅海灘唔同，Whitby Beach位於英格蘭東北部，所以天氣會比較長時間涼一啲，要睇季節天氣才能夠決定係咪適宜落水玩，但呢度有非常怡人嘅風景，配以色彩繽紛嘅海邊小屋，傳統嘅雪糕車，以及被譽為英國數一數二嘅炸魚薯條，絕對令你一試難忘。