英國為咗解決一系列問題，同時推廣健康生活，英國政府政策非常鼓勵以單車代步。但係對裝備及規則有一定要求，唔小心比人捉到就會罰款喇!

英國單車政策

去英國展開Chapter2，其中一個令人興奮嘅方面，係可以享受踩單車嘅樂趣。同好多歐洲地方一樣，為咗解決污染同塞車問題，英國政府非常鼓勵以單車代步。除咗有特別標示或高速公路，馬路都可以俾單車行，市中心唔少馬路設有單車行車線（Cycle Lanes），無論點喺馬路行都要遵守所有交通規則；部分行人路上亦會有單車徑（Cycle Tracks），記住唔好踩過界去咗行人果邊 ；紅綠燈前都有單車停泊位，俾單車等過路口；有呢啲設施記得一定要用，否則犯法可能會俾人罰款。

英國踩單車裝備要求

英國法例要求踩單車嘅人必須要戴頭盔、著淺色或螢光衣物；晚上踩單車必須安裝前白燈、後紅燈。好多人喺香港踩單車當消閒，或者有啲踩單車送外賣嘅哥哥姐姐，都未必會做到足，就係當踩緊單車要轉線或者轉彎，記得舉起果邊嘅手示意，保障到自己又保障其他人。英國法例容許用單車載小朋友，但就必須有合適嘅座位。

資料來源： https://www.gov.uk/…/the…/rules-for-cyclists-59-to-82

踩單車違例罰款金額

有人會問俾人捉到罰幾錢呢？舉d例子俾大家：

法例	罰款
危險駕駛單車	2500英鎊
不小心駕駛單車／醉酒踩單車	1000英鎊
逆線行駛／衝燈	50英鎊
行人路踩單車	50英鎊*

*英國當局放寬咗執法，當事人可以申辯有需要咁做，俾人避免做成危險，同埋方便更多人用單車

資料來源： https://www.cyclistsdefencefund.org.uk/cycling-offences

總結 ＋ 小貼士

最後醒俾大家知，喺英國住地方大，好多時需要架單車代步，但亦有好多郊外地方，值得休閑時去單車旅行探索享受一番。所以喺英國大行其道嘅車款，又唔係Road Bike，又唔係Mountain Bike，而係Gravel Bike。Gravel解碎石，Gravel Bike既賣點係同時適合Road同Off-road Cycling，係油柏路上踩又唔會太鈍，離開路面喺石仔路上面又唔會跣死。

「任世界再冷酷～想起這單車還有幸福～可～借～」

最近英國開始非常流行電動單車，詳情可以參閱我們另一篇文章《電動單車成潮流 – ebike在英國》。