英國人出名鍾意飲酒，嚟到展開chapter2生活，一定要飲返兩杯融入文化。不過英國同飲酒有關嘅法例，你又清唔清楚？例如喺某啲司法地區，法例規定任何人在業務過程中，不得售賣和供應酒類俾18歲以下人士，唔理過程是咪要由佢俾錢；但喺英國，即使未夠18歲，只要符合條件，喺餐廳都可以合法飲酒。究竟係點嘅呢？今次等我哋同大家講吓英國飲酒法例須知。
英國法例對飲酒年齡的規定
食飯時飲杯酒、三五知己摸吓酒杯底，的確係享受，特別係去到英國，有時喺餐廳叫杯啤酒，可能抵過叫一支礦泉水。飲酒的機會多咗，唔好忘記要認識吓英國有關飲酒嘅法例，以免自己誤墮法網。另外，如果有下一代小朋友嘅，更加話俾佢哋聽出面飲酒，會有咩後果。
首先講吓飲酒年齡嘅限制：
- 18歲以下人士在公眾地方飲酒，會被警方截查、罰款甚至拘捕。
- 任何人賣酒俾18歲以下人士屬違法。(侍應或酒吧經理最高罰款£20000)
- 18歲以下人士買酒或嘗試買酒屬違法。
- 成年人幫或嘗試幫18歲以下人士買酒屬違法。
- 18歲以下人士喺有牌處所(例如酒吧、餐廳)內，飲酒亦屬違法。
不過，如果只係差兩年先夠18歲，即係16歲或者17歲嘅人士，有成年人陪同下喺餐廳食飯時，可以點beer、wine或cider用來作餐飲，但要記緊責任係由成年人負責「order」和「buy」，而唔係由果位16歲或17歲人士自己負責。
係屋企飲酒對年齡嘅限制就寬鬆啲，5歲至17歲嘅人可以喺父母或監護人允許下，喺自己屋企或私人地方入面飲酒。但要緊記，5歲以下嘅小朋友，即使喺自己屋企，無論如何都唔可以俾酒佢飲，因為除咗係有緊急或醫療原因，咁樣做係違法，屬嚴重罪行。
另外有一樣嘢要緊記，如果屋企無哂酒，千祈唔好叫未成年嘅子女幫手去買，因為正如上面所講，你嘅子女和賣酒俾你子女嘅人屬違法之外，你亦極有可能引來社福機構嘅關注。
英國與醉駕有關的法例
英國法例界定醉駕嘅標準，為每100毫升血液含80毫克酒精、每100毫升尿液含107毫克酒精或每100毫升呼氣量含35微克酒精。好多人會問：「即係飲幾多杯酒先超標呀？」而負責任嘅例牌答案係「因人而異」，因為各人姓別、體質、身高體重有所不同，最好參考一些醫學研究，為自己判斷。我哋可以俾嘅參考大家係，香港嘅醉駕標準係點呢？根據香港法例，醉駕標準為每100毫升血液含50毫克酒精、每100毫升尿液含67毫克酒精或每100毫升呼氣量含22微克酒精。以下圖表可能比較清楚：
| 英國法例 | 香港法例 | |
| 每100毫升血液 | 80毫克 | 50毫克 |
| 每100毫升尿液 | 107毫克 | 67毫克 |
| 每100毫升呼氣 | 35微克 | 22微克 |
換言之，從客觀數字上，英國對醉駕嘅標準比起香港較為寬鬆，而事實上英國對醉駕嘅標準比起大部分歐洲國家亦同樣寬鬆，因為大部分歐洲國家，醉駕標準同香港一樣，都係每100毫升血液含50毫克酒精。雖然如此，都要提醒大家一句，醉駕係非常危險嘅事，千萬唔好逞強，要衡量自己狀態，飲酒最好都係唔好揸車。
至於英國警方點樣捉醉駕司機呢？基本上都係會截查、設置路障或對牽涉交通意外嘅司機，先喺路邊要求呼氣測試，超標嘅話就要返警局用部大機再做，再超標嘅話就會被檢控。刑罰根據超標程度而定，通常會被停牌至少12個月，法例無為罰款設上限，監禁就最高6個月。
英國法例相關文章:
Source:
Children and drink: What’s legal?