英國羽絨被鋪種類及價錢

Chapter2 Editor

3 年 ago

英國冬天要開Radiator真係無法避免，不過今年英國電費媒氣費係咁加價，大家都要諗下計仔點樣慳得一鎊得一鎊。三更半夜同埋清晨就最凍，夜晚瞓覺點保暖就十分重要，較定Radiator定時開關就一定嫁喇，但係無理由長開嫁嘛，所以有返張羽絨被保暖就啱喇! 英國羽絨其實都好平，等我同大家簡單介紹下啦! 而家買定差不多了，否則再凍d就有機會比人掃哂喇!

Table of Contents

Toggle

羽絨被的種類

如果你用Google translate, 羽絨被英文會係Duvet，過去可能一定要用動物羽毛先可以叫做羽絨，但係今時今日已經唔係了，羽絨主要分為兩大種類天然物料及合成物料。

1 . 天然物料

通常比較柔軟同埋輕身，材料包括鴨毛或鵝毛，如果比較高級既就會選用胸部的羽毛，因為比較幼細而且輕身，如果比較普通嘅羽絨冇咁講究，用其他部位嘅羽毛，就會重身少少，亦都有d羽絨會係兩者Mix埋，買果時記得睇下個成份標籤。天然羽毛羽絨出產地以匈牙利，瑞典及加拿大出品最為優質。有人會對鴨毛或鵝毛敏感，可以考慮絲或羊毛被。

2. 合成物料 (Synthetic duvets)

由於用動物嘅羽毛或毛髮去製造羽絨被，有唔少人認為係唔人道，所以有合成物料嘅羽絨出現。合成材料嘅羽絨相比天然物料嘅羽絨致敏機會較低，而且清洗容易。當中材料再細分為兩種 – 中空纖維及微纖維。

顧名思義，中空纖維中間就係通窿，咁就可以有效留住體溫，但係中空纖維比較粗同硬，所以舒適度比較下會略差。而微纖維就比較高級，感覺同天然羽絨類似，而且更比一般天然羽絨被更輕。

羽絨保暖的等級

唔好以為羽絨只可以係冬天用，其實都有羽絨被係可以比夏天用，點分? 就可以用量度羽絨保暖度的等級 Tog黎分辨。

TOG等級最低係1 Tog，最高就係15 Tog，愈高等級即係愈暖。如果係英國夏天，你可以揀1-7 Tog都可以，如果冬天，就最少要10.5 Tog或以上了，今日經過Morrison睇睇，可能近冬天，最低只有10.5 Tog，最高去到13.5 Tog。不過要留意Tog只係保暖度，而同羽絨重量無關，由天然物料製造嘅羽絨被，如果係同一個Tog等級，一般係會比合成物料更輕。