嚟到英國生活展開Chapter2，英國電影唔單止可以俾你娛樂，更可以了解英國文化。近呢三十年英國電影都有唔少出色嘅作品，例如94年《四個婚禮一個葬禮》、96年《迷幻列車》、99年《摘星奇緣》同埋我最愛嘅愛情電影03年《真的戀愛了》，都體現咗英國人較為感情豐富、用情細緻、喜歡言之有物同埋幽默嘅特質。不過呢啲戲咁近代，我哋唔鍾意介紹又易搵又多人知嘅嘢，等我哋介紹吓英國嘅黑白片，唔好以為呢啲舊片一定睇到打哂呵欠，分分鐘好睇過而家唔少戲呀。
1.《The Third Man》「黑獄亡魂」
一開始介紹，梗係介紹齣最勁架啦，呢套黑色題材兼懸疑電影，曾經在1000名英國電影人士嘅調查入面，被選出為一百套最佳英國電影之首。《The Third Man》在1949年拍攝，故事背景喺二次大戰後，被美英法俄分割嘅奧地利首都維也納，講述主角來自美國人小說作家Holly Martins，去維也納搵佢朋友Harry Lime，因為Lime話有份工介紹，Martins去到維也納發現Lime喺馬路發生意外死咗，Martins出席Lime嘅葬禮，遇到兩名負責調查意外嘅警員，又認識咗Lime嘅兩位朋友同埋Lime嘅女朋友Anna，之後又搵到搶救Lime嘅醫生，Martins同各人傾傾吓，懷疑Lime嘅死似乎唔係意外咁簡單，最可疑嘅地方係有目撃者話意外發生時，有2個人幫手抬Lime埋一邊搶救，有人就話有3個人一齊抬，究竟2個人定3個人呢？所謂嘅第3個人係邊個呢？哈哈哈，我梗係唔話你知，自己租嚟睇啦！
戲情唔可以踢爆，拍攝手法可以講吓，《The Third Man》呢套戲一個出名嘅地方，係佢用咗大量「Dutch Angle」斜角鏡頭，即係攝影機故意唔set成水平，令到畫面嘅四邊同畫面入面垂直線同地平線唔會互相平衡，簡單嚟講好似「歪菱歪稱」，主要用嚟突顯果種不安、荒旦同張力，睇嘅時候留意吓嘞噃！
2. 《Brief Encounter》「相逢恨晚」
第二齣介紹嘅係《Brief Encounter》「相逢恨晚」，呢齣黑白片排名都係名列前矛，1945年上映，一聽個名就知係愛情片，講述二戰前一名中產已婚有子女嘅女主角Laura，生活規律平穩，逢星期四坐火車到市區買日用品，有一日在火車站咖啡室遇到男主角同樣已婚醫生Alec，Alec亦是逢星期四坐火車到市區工作，兩人之後逢星期四都會碰面，漸漸互生情愫，但女主角內心又好爭扎，愧對對佢好好嘅老公，最好笑係佢哋約會又撞到朋友又俾人搞亂，連最後男主角要去南非工作，喺火車站依依不捨分別時，都因為發生某件事又唔能夠好好道別，想知咩事？自己睇啦！
3. 《The 39 Steps》「國防大機密」
最後一齣決定講《The 39 Steps》「國防大機密」或「39步」、=或「39級台階」，原因無他嘅，除咗套戲喺啲調查排名都係頭幾位，咪就係希治閣囉！呢位鼎鼎大名嘅英國人導演，去到荷里活拍出咗經典嘅《迷魂記》、《Psycho》、《電話謀殺案》，但未去美國前喺英國亦拍咗好多重要作品，《The 39 Steps》就係其中之一。套戲有大師一貫嘅緊張刺激，故事峰迴路轉，簡單嚟講男主角Richard睇睇吓一個記憶大師表演，突然傳出槍聲，出現咗一名女子要求Richard救佢，Richard就捲入咗間碟組織嘅追捕。
呢度可以睇到BBC報道最佳100大英國電影: http://news.bbc.co.uk/2/hi/entertainment/455170.stm
最後想講嚟到英國生活，想搵返呢啲戲睇可以點做呢？最簡單梗係上Amazon UK啦，好似上面幾齣戲咁，租嚟網上睇£3幾一次，當然亦有其他地方包括荷里活電影，新啲嘅戲都係差唔多呢個租價，有啲戲可能平到£1就有交易！仲等咩，買定爆谷將英國屋企變做戲院啦 ！
Source: Amazon UK
Source of Pictures: https://www.imdb.com/title/tt0041959/mediaindex/