夏天又嚟嘞！當然要盡情享受戶外活動。英國出名多水域，點樣可以好好享受喺河道、湖泊甚至海岸嘅美麗風光，相信你都有聽過近年興起嘅Stand up paddling，簡稱SUP，中文叫直立板，即係喺水面企喺塊浮板上面划槳來移動，可以一邊做運動，又可以休閒咁欣賞沿途風景。究竟喺英國玩SUP有咩要注意？又有咩好地方呢？又要唔要攞牌呢？今次同大家講吓。
雖然係叫做Stand up paddling，但其實除咗企喺度，亦可以坐喺度，跪係度，甚至趴喺度式划槳嘅，所以千祈唔好覺得長期企喺度會好攰。不過企喺度係有好處嘅，就係目光離水平線高好多，名乎其實嘅「水上飄」咁，睇得好多好風景架。
Table of Contents
玩Stand up paddling SUP 直立板所需器材
好嘞，Stand up paddling 玩SUP直立板要咩器材呢？最重要當然係塊板和槳啦，先講塊板，主要分為硬式和充氣式，硬式其實就好似一塊滑浪板咁，實實淨淨嘅一塊板。但由於硬式SUP板收藏和攜帶都比較唔方便，所以近年都興起用充氣式SUP，而且因為充氣式SUP可以放氣收埋，所以與硬式SUP板比較，可以比較大和輕，槳起上快啲又易控制啲，樂趣更多。
講起SUP板，順便講埋兩個配件，分別係尾舵和腳繩，都係玩SUP必須品。尾舵安裝喺SUP板底尾部，划板時浸在水底板下面，用來穩定住塊板前進嘅方向，無咗佢划起上嚟，塊板只會氹氹轉。而腳繩就係用嚟圈住划板人其中一隻腳腕，再扣住塊直立板，作用係如果划板人跌落水，塊板都唔會沖走，只要拉返條繩就可以埋返去塊板度。
到講下槳嘞，而家大部分槳都係可以拆成細節，都係因為要方便攜帶啦。要注意嘅係要留意身高，配合返合適號碼嘅槳，而家好多廠家都推出咗可以調較長度嘅槳，所以通常只會分成大細碼，然後各自適合某個高度範圍嘅朋友使用。
最後兩樣都非常重要嘅配件，一樣係救生衣，就算識游水都好，但划咗一段時間，可能已經付出咗一定體力，又或者大腿等部位未夠熱身，萬一跌落水未必游到，所以救生衣非常重要。另一樣重要嘅配件就係防水袋嘅，用來裝電話財物，有啲防水袋可以掛在身上，有啲大啲就可以勾喺塊板上面啲繩，視乎要裝幾多嘢啦。
Amazon UK有唔少成套SUP裝備可以選擇 – https://amzn.to/3NhkiBg
喺英國邊度玩SUP直立板好?
咁喺英國有咩水域可以玩SUP直立板呢？一開始唔建議去海玩啦，因為唔同海域有唔同大小程度嘅浪，實在唔係度度啱玩SUP直立板，而且英國海邊嘅浪一般都比較大，就算啱玩都需要好高技術。何不好好享受英國眾多嘅河流、湖泊、運河等呢。介紹你以下呢個網頁https://gopaddling.info/find-paddling-trails/ ，你只需要輸入要求，包括地點、路程總類(one way、circular定out and back)和難度，佢就會提供好多路線選擇，最正係每個選擇都有個PDF file可以download，內容詳細列明有關路線嘅資訊，包括起點、終點、咩水域、文字描述、要注意事項等。
{https://gopaddling.info/find-paddling-trails/ 可以幫手搵到喺英國玩SUP最適合你嘅路線}
在英國咩水域玩SUP直立板要申請牌照 ?
特別要提嘅係，上面網頁所提供路線嘅PDF，入面有講明條路線需唔需要license。事件上，英國好多不同水域都有不同嘅部門、組織或團體管理，好多時喺需要申請license先可以玩SUP或獨木舟等划槳活動，申請費其實主要都係用來保養有關水域，例如清理垃圾、監察水質等等。雖然好似要俾申請牌照費，但換一個角度睇，證明呢啲路線都係安全，有人保養管理，玩都安心啲。但點知邊個水域邊度負責管理，向邊個申請license呀？介紹你啲個網站 https://members.britishcanoeing.org.uk/ ，佢類似統籌管理不同水域嘅單位，推出Waterways License，申請咗就可以入面長達4500km嘅水域度划槳玩直立板嘞。
{British Canoeing網頁，watereay license 個人一年牌照費£27至£45 https://members.britishcanoeing.org.uk/}
上堂學玩SUP直立板
最後，初玩直立板嘅朋友，最好當然係上吓堂，掌握吓基本技術先，去呢個網頁https://gopaddling.info/find-course-providers/ 可以搵到英國邊度有SUP直立板堂上，希望你從SUP搵到樂趣啦!
{尋找英國可以學習SUP直立板嘅course https://gopaddling.info/find-course-providers/ }