嚟到英國展開chapter2生活，好多朋友住嘅地方大咗，尤其是可能以前住開apartment，變為住house，能源消耗難免多咗。正所謂「小數怕長計」，能源效益喺咁嘅情況下更加重要，如果喺家居慳返啲水、電和燃料，長遠可以慳返唔少錢。與很多歐洲國家一樣，英國非常重視環保，因此有政策鼓勵檢視家居嘅能源效益，叫做「The Green Deal」。究竟有咩貼士可以令屋企慳啲源，The Green Deal政策又係點嘅呢？今次同大家講吓！
Table of Contents
官方認可的Simple Energy Advice
要為家居節省能源，可以從多方面入手，但亦因此令人無從入手，特別係喺chapter2生活，間屋普遍大咗，究竟應該做邊樣先、點樣做呢？介紹一個網頁Simple Energy Advice https://www.simpleenergyadvice.org.uk/ 俾大家，呢個網頁由官方 Department for Business, Energy and Industrial Strategy認可，換言之入面嘅建議，成效起碼獲得肯定，而且達到安全標準。根據呢個網頁，大家檢視家居嘅能源效益，可以從呢幾個方面入手：
- 供暖和熱水
- 門和窗
- 地板、牆和屋頂
- 太陽能
供暖和熱水
「供暖和熱水」方面，呢個網頁有好多節省能源嘅建議俾大家。其中一個貼士，係喺浴室安裝「heat recovery system」。咩係「heat recovery system」呢？簡單嚟講，我哋冬天沖熱水涼，熱水淋一淋過身體就會沿渠口流走，浪費咗呢啲水仍然有嘅熱量。「Heat recovery system」可以將呢啲會原本會流走嘅熱水，引流到用來預熱一啲即將進入熱水爐被加熱嘅水，咁樣熱水爐就唔需要咁多燃料，用嚟將水加熱至同一個溫度。不過「heat recovery system」，只可以用喺「mixer shower」，即係用熱水溝凍水至合適溫度嘅花灑系統，唔可以用喺「electric shower」，即係用電來將水加熱至合適溫度嘅熱水爐。
門和窗
唔好以為門和窗，與節省能源毫無關係，其實係好大關係！你諗吓你冬天喺室內開暖氣，如果門隙和窗隙都漏風，凍氣入哂嚟，咪浪費哂啲暖氣，要用多啲能源keep住個溫度囉。所以好好封閉門隙和窗隙(Draught-proof)，慳到唔少暖氣。
另一方面，如果隻窗得單層薄玻璃，冬天外面嘅冷空氣，咪好容易透過隻窗令到室內降溫，改善方法包括換窗加厚玻璃、或變成兩層，又或者裝上「secondary glazing」，即係類似喺室內窗後面，加多一隻窗，形成一層空氣，作為絕緣體防止熱力由室內流失。
以上道理喺夏天同樣適用，試諗吓室內開住冷氣，但熱氣不斷由門和窗走入嚟，冷氣就走哂出街，幾浪費電力呢！
地板、牆和屋頂
如果你間屋底層地下係實心混凝土或者石板，由於下面無一層空氣作為絕緣體，冬天會可能會感受到陣陣寒氣，從地下滲出嚟，同樣浪費好多暖氣。要改善呢個情況下，可以加裝一層絕緣地板，比較簡單嘅方法，係喺混凝土地上面鋪設，但會令到樓底矮咗，另一個比較複雜嘅方法，係掘走一層表面混凝土地面，再鋪設絕緣地板，咁就可以保留返個樓底高度。
除咗地板，牆和屋頂同樣可以舖設絕緣物料，減少室外環境影響室內嘅溫度，繼而節省暖氣和冷氣嘅能源消耗。尤其是你間屋有閣樓(loft)或屋頂房(roof room)，如果發現冬天即使有暖氣點都唔暖，好可能屋頂和牆嘅絕緣做得唔夠，可以留意改善吓。
太陽能板
太陽能當然係環保嘅可再生能源，善用太陽能可以減少家居用電和燃料，尤其是而家太陽能裝置越來越平，長遠節省開支通常都有著數。家居利用太陽能，通常有兩個途徑，一係安裝太陽能板(solar electric panel) ─ 將太陽能轉化為電力使用；二係安裝太陽能熱系統(solar thermal panel) ─ 利用太陽能提供熱水。
隨住科技進步，太陽能板越來越平之餘，亦越來越有效能，安裝係花園或屋企都係可選擇嘅位置。而且唔好以為英國日照時間，尤其是冬天唔算長，但有裝置可以將電力儲起來用。之前英國曾推行過計劃Feed-in Tariffs，將家居太陽能板生產嘅電力，賣返俾電力公司，賺取返啲收入，但計劃而家已經完結咗。講出嚟係想話俾大家聽，唔好睇小太陽能板產生嘅電量，某啲時間足夠家居使用，甚至多到可以賣返出去添。
至於太陽能熱系統，通常安裝喺屋頂，簡單嚟講裝置入面嘅水吸收陽光嘅熱力，呢啲暖水再喺管道系統內流動，將熱力傳俾其他水。陽光充足而又唔太凍嘅日子，單靠呢個裝置嘅水溫已經可以沖涼。如果天氣凍一啲，熱水爐將水加熱，亦都唔使咁多能源。
「Green Deal」政策
我哋當然知道唔同家居有唔同情況，以上只係網頁Simple Energy Advice提供嘅部分改善能源效益嘅方法，仲有好多方法我哋無講到。不過講到底，任何以上方法牽涉改動，都需要成本，究竟長遠慳到幾多？值唔值得做呢？呢方面最好當然問專業人士。英國政府喺多年前已經握動「The Green Deal」政策，宗旨就係希望協助家居找到成本低於長遠慳到錢嘅改善能源效益方案。呢個政策鼓勵家居找來Green Deal assessor或provider，去到你屋企檢視，制定出可以節省能源嘅方案。當然搵佢哋嚟屋企睇和制定節省能源方案，需要付出費用，但佢亦會就真係要動工改善幫你quote價，計算埋改善後能源開支可以慳幾多，令你知道應唔應該做，應該做邊啲改善工程。呢個政策下，亦可以申請貸款嚟進行改善。想知多啲政策內容，或者搵Green Deal assessor或provider，可以去呢個網頁https://www.gov.uk/green-deal-energy-saving-measures 睇睇。