暑假即將要完結，好在7月正式解封之後趁夏天去左唔少地方玩。出到去玩最重要除咗住宿之外就係要搵食，尤其係帶住小朋友，所以呢兩個月後有啲搵餐廳開飯的體會想分享，亦順便介紹下幾隻英國搵餐廳同埋訂枱嘅手機app!
Table of Contents
搵食艱難
話說有幾次同埋朋友兩家人一家大細一齊去玩，曾經有去附近有一大堆舖頭嘅shopping area，亦曾經去過其他城市。搵地方畀小朋友玩其實相對簡單，但係玩完之後打算搵嘢食，就難到幾個大人了。一來英國地方太大，人生路不熟所以都唔知有咩餐廳可靠，一開始我哋通常都係搵附近近近哋嘅餐廳解決就算，但係好多時因為要照顧小朋友嘅需要，要搵好耐先搵到要食乜。第2個問題係亦怕間餐廳唔好食會中伏，但大部分非快餐類的餐廳做晚市都冇得walk-in或者最少要等45mins。
好多時喺門口望入餐廳，會發現明明好多位，但係侍應都唔會畀你入座，因為大部分位置已經畀人訂咗，可能因為呢邊唔會好興限制用餐時間，所以侍應或餐廳會怕如果招呼咗其他客人，到時訂咗枱嘅客人就冇位置。
好記得曾經有一次喺個shopping area玩完打算食晚飯，心諗附近有成7間餐廳，玩完慢慢揀，點知去到其中5間餐廳都係已經滿座或比人book左，只有淨低連鎖式快餐店five guys係大把位，就算係Nando’s門口都人頭湧湧。
因為唔想小朋友又食薯條咁熱氣，所以我哋寧願搵附近週邊既餐廳再揸車過去，不過可惜我哋啱食嘅全部已經滿座，好在市中心都係15分鐘車程我哋決定揸返車過去搵食，但係市中心同樣非快餐店餐廳全部滿座，最快亦都要等45分鐘至1小時。最後….結果….係喺市中心食five guys，得到呢個教訓之後我同朋友就知道出街食飯一定一定要先訂枱，尤其係你帶住一班小朋友如果要大家一齊乾等就大鑊了。
英國餐廳搵食App
今次為大家介紹嘅並唔係外賣apps而係主要睇評論及訂枱嘅apps
1. Opentable
係一個包含世界各地餐廳的手機App，總共有超過50000間餐廳資料。透過Opentable你可以按時間book位，睇review，睇Menu，睇環境相、甚至睇到有邊個外賣App可以Order依間餐廳的食物。
下載次數: 5M+
官方網站: https://www.opentable.co.uk/
2. Quandoo
又係一個全球性的App，不過係英國國內主打係London, 單係London已經有2,552間餐廳資料，可惜緊隨其後伯明翰只有225間，差成10倍。功能同以上大同小異，不過就無得睇邊間外賣公司資料了。
下載次數: 500k+
官方網站: https://www.quandoo.co.uk/
3. Zomato
同樣亦係一個全球性手機app database包括咗全世界24個國家及地區共150萬間餐廳。數量多還多，但係唔少餐廳連一張圖都冇，而且亦唔可以透過佢哋個app直接訂位，不過有機會會搵到d 以上 app沒有包括的餐廳。
下載次數: 500k+
官方網站: https://www.zomato.com/
4. The Fork
編輯見到呢個手機app有咁多下載次數所以特登download落嚟試埋，功能同餐廳都算齊全，不過review數目比較少
下載次數: 10M+
官方網站: https://www.thefork.co.uk/
5. Yelp
Yelp喺美國係一個十分出名的餐廳review網站，可惜呢到英國餐廳review嘅數量比唔上美國，不過就好過The Fork同埋Zomato。可惜冇得直接經訂位只會提供電話預訂資料
下載次數: 50m+
官方網站: https://www.yelp.co.uk/
其他收料有用App
1. Nextdoor
如果想喺自己住嘅區域附近搵食，可以透過 Nextdoor app去問街坊有咩推薦，不過留意外國人口味同香港人口味可能會略為不同，佢認為好食嘅唔一定代表啱你口味。相關文章: 認識你的鄰居與社區— Nextdoor App
2. Google Map
Google map其實唔係淨係search路線咁簡單，仲可以用唔同keyword搵出你想要嘅嘢，例如如果你想食泰菜，首先你需要係地圖上搵出你嘅目標區域，直接打Thai food係個search bar道，咁佢就會喺地圖直接顯示你附近邊度有泰菜。就算你唔係想搵嘢食係想搵車房都可以用同一個方法。餐廳資料下面你除左可以搵到電話地點營業時間等資料外，你亦都可以睇到評論，雖然香港google map都有，但相比之下英國更加流行係google map比評論，唔少餐廳都會有幾百個評論，如果一啲質素比較好嘅過一兩千都周時會有。雖然唔能夠保證平靚正，但係如果評論平均有四五星又有番幾百個，應該就唔會咁易中伏嘅。
飲食相關閱讀: