早前熱浪侵襲歐洲，英國氣溫一度高達攝氏40度！咁熱嘅天氣下除咗玩水，真係唔知有咩活動好做。我哋曾經為chapter2朋友介紹英國嘅水邊營地、wild swimming和玩直立板嘅好去處等等，好適合喺暑熱天氣下做嘅活動。今次等我哋再接再厲幫大家消暑，介紹一下英國最好玩嘅waterpark，當中有休閒、刺激、室外、室內、度假等唔同種類，適合唔同朋友。快啲捉緊夏天嘅尾巴，享受「涼浸浸」嘅暑假啦！
Table of Contents
英國五大最佳水上樂園Waterpark
水上樂園係一個令人難忘嘅地方，就算過左好多年，間中都會諗起某年仲夏同一大班家人或朋友，喺水中享受碧波盪漾、你追我逐嘅愉快時光。我哋知道人人泳術唔同，有人高有人低；有人鍾意刺激，有人鍾意休閒；有人一家大細，有人一班後生仔享受青春；有人鍾意室外同陽光玩游戲，有人鍾意室內穩定環境，咁就等我哋一次過介紹哂唔同類型水上樂園俾大家啦！
Sandcastle Waterpark, Blackpool
https://www.sandcastle-waterpark.co.uk/
呢個水上樂園係全英國最大嘅室內水上樂園，有多達18條滑水梯，簡直係諗得出滑水梯嘅類型都有，其中一條叫Masterblaster全長250米，號稱全球最長室內滑水梯，坐喺水泡上玩要成一分鐘先瀡完全程；又有另一條滑水梯Aztec Falls，滑水梯一段隧道接近全黑，瀡緊時睇唔清前路環境，非常刺激。由於係室內，場地溫度保持喺攝氏25度以上，基本上係全年放開，每年8月至11月就每天都開門，而其他季節就喺特定日子先接待遊客，
入場費：(三小時) 3-7歲£15；8-10歲£20；11-60歲£24
Splashdown, Poole, Dorset
https://www.splashdownwaterparks.co.uk/poole/explore-the-park/
Splashdown有13條不同刺激程度嘅滑水梯，最剌激可以話係名稱叫The Screamer嘅一條，玩者無喺5秒內滑下40米嘅高度；另一條值得介紹嘅滑水梯叫Infinity，隧道入面會有雷射燈和音樂，十足十Disco咁，令人情勢興奮高漲。呢個水上樂園另一個優點，係有三個適合5歲以下兒童嘅splash zone，入面唔單止水淺，亦有較短嘅滑水梯，最適合有大有細嘅家庭。要留意呢個水上樂園只開夏天，冬天會關門維修。
入場費：(兩小時)£15.50；(三小時)£18；(5歲或以下) £8.5
Alton Towers Waterpark, Alton Towers Resort, Alton
https://www.altontowers.com/explore/waterpark/
我哋喺另一篇文曾經介紹Alton Towers，呢個英國最大最出名嘅主題樂園，有好多好玩機動遊戲，入面又點會少得水上樂園呢？Alton Towers Waterpark位於園內嘅Splash Landing Hotel旁邊，酒店每層都有電梯可以連接直達，玩到攰即刻可以返房休息，非常適合想過夜度假嘅朋友。Waterpark內有室內和室外部分，唔使擔心天氣影響活動。水上樂園除了有多條滑水梯外，亦有一個叫Bubbly Wubbly Pool嘅設施，池內充滿水霧和水泡，令你彷如置身溫泉或火山之中。
入場費：(3歲或以上)£21 (網上預訂£16.50) 3歲以下免費 (3歲至16歲須由成人陪同)
Waterworld, Stoke on Trent, Staffordshire
Waterworld以熱帶室內水上樂園為主題，旁邊有Waterworld Leisure Resort，同樣適合過夜度假。Waterworld全年開放，入面有30多個滑水梯、造浪池等玩水設置，當中包括英國第一個俗稱「沖廁所」或「太空艙」嘅滑水梯Thunderbolt，即係果款玩家企入個艙度，閂埋透明艙門後，腳下嘅活門會喺無預先提示下打開，玩家就跌入滑水道高速沖落去，刺激非常。場內大部分係室內設施，但亦有室外游泳池，啱哂喜歡享受陽光嘅朋友。
入場費：(2歲以上)(至少3小時) £22
Liquid Leisure Windsor, Horton Rd, Datchet, Slough
https://windsor.liquidleisure.com/
同之前介紹嘅水上樂園唔同，Liquid Leisure Windsor所有場地都係位處室外一個湖上，以大型充氣裝置組成遊樂設施。呢個水上樂園賣點唔係大型滑水梯，而係一個一個喺水面上嘅挑戰賽道，即類似外國嘅電視節目，有各式各樣障礙物令你跌落水，亦有大型水上繩網，絕對適合想挑戰自己體能嘅朋友。另外亦有香蕉船、滑水等設施，可以話係非一般嘅水上樂園。當然唔少得有小朋友程度嘅賽道，可以訓練一下小朋友嘅膽量和體能。如果唔想落水，湖邊有餐廳酒吧，可以邊食邊飲邊欣賞湖光美境。
入場費：視乎使用不同設施而定