本來打算一集講曬英國退租及搬樓有關事宜，但係寫寫下原來先發現英國退租都幾多嘢需要留意，如果未睇上一集嘅可以去呢度睇返，而今集係講搬屋，內容主要係分享個人經驗，包括關於喺邊度搵到英國搬屋公司同埋價錢，而非教學，請大家留意。
Table of Contents
搬屋背景
首先簡單講講今次主編搬屋背景，主編舊屋係兩房一廳嘅Semi-detached House，由於業主包曬廚房電器，即係洗衣機及雪櫃等等…所以主編主要需要搬客廳同埋睡房嘅傢俬，即係包括一張King Size床+床褥、一張小朋友單人+床褥、1個IKEA 2米闊大衣櫃、1個小朋友衣櫃、三座位Sofa、鞋櫃，小朋友玩具櫃、飯枱、電腦枱、電腦凳、電視櫃及55吋電視，另外仲有20箱包括新+舊由香港船運送嚟十幾箱冇開過嘅紙箱。而搬屋距離只係十分鐘車程外同區新地址，所以某程度上價錢係會比較平，大家可以當係參考。
另外慶幸有車房可以留返起當年喺香港船運過嚟拆開咗嘅紙箱，所以今次唔需要特別買紙箱，如果需要買紙箱可以去Amazon睇睇。
Amazon買紙箱 – 傳送門
Amazon買Bubble紙 – 傳送門
英國係邊搵搬屋公司及價錢?
問本地人/鄰居
當然你可以上香港人開嘅facebook/Signal/Telegram group搵返同聲同氣的自己人搬屋，但係大家都係初到英國，建議都要多D比較。主編當時就係去英國本地人士開嘅facebook group出Post請本地人介紹搬屋公司，如果你住緊嗰區唔係咩大區又或者冇facebook group，可以考慮上nextdoor問下鄰居，唔知咩係Nextdoor? 可以睇下我地文章 – 認識你的鄰居與社區— Nextdoor App。
最後主編揀咗4個最多人提及嘅搬屋公司去pm佢哋查詢價錢，由於主編揀咗星期日搬屋，所以第一樣嘢就係問佢哋星期日開唔開工，因為英國人真係唔係個個都星期日會做野，結果當中有真係有一間星期日係唔開工。另外由於主編喺需要2個星期後搬，都算係搵得幾急，結果當中有一間最多人介紹嘅已經full曬接唔到Job，只好問餘下2間。主編有準備一份pdf搬屋清單方便佢地報價，結果2間分別報價如下，公司A – £45/hr(估計4小時搬好), 公司B – £200一個job(估計3小時搬好)，兩者都係包2個人搬運及車，不過唔包拆傢俬，Confirm之前記得問清楚。最後主編揀左公司A，因為係第2多人推介，不過係Confirm之前其實都有係網上格下價，大家可以試下以下網站，不過要留意報價分別都幾大，有機會係因為平台有唔同司機、平台服務費及額外服務選擇，所以大家可以試下Quote多幾次。
1.Compare the Man and Van
Website: https://www.comparethemanandvan.co.uk/
介紹: 可以自定按時間收費同埋需要幾多人手搬屋，我用返以上4小時及2個人作比較，依間最平嘅選擇係£263，亦係以下介紹幾間當中，價錢最接近本地人既報價，而且仲可以睇埋該司機接過幾多個Job，稍令人有多少少信心，可惜就係沒有額外服務，例如裝拆服務及Packing服務，不過估計可以email比師傅直接問。比錢可以揀立即比哂定係比Deposit。以下係價錢breakdown。
2.Anyvan
Website: https://www.anyvan.com/
報價£308 – Anyvan除左問你地址之外，仲需要你填一個checklist睇下你有幾多傢俬電器要搬，但主編認為會出現一個問題，如果搬屋到時真係多咗傢俱或箱頭咁究竟個差價點計呢？所以我認為搵本地人介紹師傅同埋Compare the Man and Van主要以時間及距離去定價會穩陣啲。不過Anyvan有樣好，就係有提供裝拆服務同埋加錢買包裝物料，但係你可以參考下圖價格，拆就£20一件，裝就£30一件，其實都真係好貴，不過如果無辦法都要比人賺。比錢方便係搬屋日前3日過數，但係48小時前cancel係可以full refund。
3.Shiply
Website: https://www.shiply.com/
£490 – 以上係經Shiply Quote 價而收到既email報價，係所有選擇中最貴，無裝拆服務，不過有Packing Service，Quote得以上2個不妨都唔差在Quote埋依個，或者你Quote同主編Quote結果唔一樣。同Anyvan一樣都係要填checklist。一次個收到咁多email比人炸其實都有D Annoying。
搬屋過程經驗分享
當日九點鐘嚟搬屋，一開頭以為係會用㗎5.5噸走兩轉就搞掂，點知黎架車係平時大家見到超級市場送貨車類似，不過在大部少少，問返師傅依種車叫Luton Van。 另外竟然係有三個人出現，不過其中一位其實係搬屋公司老細叫埋佢個二女過嚟幫下手，主要係負責比較輕嘅物品。
黎到英國都習慣咗比較慢既生活節奏，當然預咗英國搬屋速度無得同香港比較。雖然速度唔快，但係佢地都十分細心，會留意轉彎位或者同埋會唔會撞花牆同傢俬，而且上到車有用布隔開唔同嘅傢俬及電器，令佢哋唔會撞花。結果最後來回四轉，由9am搬到2pm其5小時就完成，即係Total £225，即時銀行過數之後主編仲畀咗£20現金當係小費，講真英國人星期日通常都會休息，人哋嚟幫你搬樓，如果能力許可畀番少少小費支持下。
最後想提一提，搬屋過程雖然冇乜特別，但係由於佢地係根據時間嚟收費，如果你肯親自幫忙相信會快唔少，當然大件傢俬電器等等梗係留返專業人士處理。上半場主編主要都係喺度行行企企，但係由於想早啲完成可以食lunch，最後都走咗去幫手搬下箱同埋櫃筒，感覺上起碼慳咗半小時，都成£22.5嫁!
總結
整過退租同埋搬屋過程尚算順利，不過搬完屋要砌傢俬同整理物品又係另一個地獄嘅開始，仲要洗錢買埋新電器，不過終於有位可以裝洗碗碟機，主編表示家庭和睦又邁進咗一步，但係估唔到最地獄嘅係新租盤同能源公司攪轉名，下次有機會再同大家分享。
相關閱讀: 英國退租及搬屋分享(上) 你嘅搬屋寄貨包裝好幫手 – RAJA UK