芝士由奶經過凝固加入酵素等程序製作而成，根據採用唔同奶、酵素、調味料、加熱溫度、發酵時間等因素，分為不同種類嘅芝士。全世界有幾百甚至上千種芝士，無可能全部認識，但講到最常食用，尤其是係喺chapter2英國生活，肯定非「車打」Cheddar芝士莫屬。你又知唔知道，Cheddar芝士其實源自英國一個地方，今次等我哋話俾大家聽！
Cheddar芝士源於英格蘭西南部Cheddar村莊
相信大部分chapter2朋友最初認識「Cheddar」呢個字，都係源於佢係其中一種芝士，常用於漢堡包、三文治的餡料，口感唔算硬亦唔算軟，有適中香濃芝士味，鹽度則屬於低。其實Cheddar係英國西南部Somerset郡嘅一條村莊，果度附近有一個峽谷，內有好多洞穴，環境、溫度和濕度都非常適合俾芝士熟成。早於12世紀，Cheddar呢個地方已經生產芝士，更加吸引到當時嘅國王亨利二世購買享用。直到19世紀，當地一位叫Joseph Harding嘅奶農，真正令Cheddar芝士發揚光大，佢將大幅改良咗生產芝士嘅技術，一種可以將水份由凝乳排出嘅方法，簡單嚟講是一種切割凝乳、堆疊凝乳，然後用手攪伴凝乳嘅過程，令佢自己變乾變硬。Joseph Harding更加呢個程序系統化，向蘇格蘭、美國甚至澳洲推廣，令到Cheddar芝士漸漸走向世界。
〈Cheddar是位於英格蘭西南部Somerset郡一條村莊，附近峽谷有洞穴適合芝士熟成〉
可參觀目前Cheddar唯一芝士廠
發展到今時今日，Cheddar已經成為英國最多人食用嘅芝士，全世界嚟講亦肯定係數一數二，好多人都覺得Cheddar、Parmesan 巴馬臣芝士和Mozzarella水牛芝士，係世界上三大芝士。今日所講嘅Cheddar芝士，只係指用呢種方法生產嘅芝士，唔一要喺Cheddar呢個地方生產。事實上，Cheddar目前只係剩低一間生產芝士嘅工廠，大家有興趣去參觀，以及食到最最最正宗，喺Cheddar生產嘅Cheddar Cheese，可以去呢個網頁了解吓點樣參觀。https://www.cheddaronline.co.uk/visit-us/
〈Cheddar目前只剩一間工廠生產Cheddar Cheese〉
Cheddar芝士食譜多元化
〈Cheddar Cheese有很多款式的食譜〉
Cheddar嘅食法有好多，除了可以用來做漢堡包和三文治，亦可以用來做沙律，甚至焗麵包、焗飯、煮湯等等。如果想要食譜，可以去呢個網貢睇睇。https://www.bbcgoodfood.com/recipes/collection/cheddar-recipes