好多人都會攞住車牌(駕駛執照)去到英國展開chapter2生活，落地後轉個英國車牌，然後買架私家車代步，始終英國地方大，交通始終係一個實際要考慮和解決嘅問題。不過揸私家車要油錢要泊車，次次出門都揸車開支都唔少，亦未必最方便，有咩其他選擇呢？踩e-bike係個好選擇，但所用係受限制嘅電池和摩打，要考慮路程、速度和時間。電單車又點睇？原來喺英國，如果有當地車牌，只要上一日堂，就可以合法地駕駛125cc以下嘅電單車(motorcycle)，有興趣仲可以用嚟送外賣搵外快，今次等我哋講吓啦！
Table of Contents
合法地換領電單車牌照 駕駛125cc以下嘅電單車
好多人都會攞住車牌(駕駛執照)去到英國展開chapter2生活，落地後轉個英國車牌，然後買架私家車代步，始終英國地方大，交通始終係一個實際要考慮和解決嘅問題。不過揸私家車要油錢要泊車，次次出門都揸車開支都唔少，亦未必最方便，有咩其他選擇呢？踩e-bike係個好選擇，但所用係受限制嘅電池和摩打，要考慮路程、速度和時間。電單車又點睇？原來喺英國，如果有當地車牌，只要上一日堂，就可以合法地駕駛125cc以下嘅電單車(motorcycle)，有興趣仲可以用嚟送外賣搵外快，今次等我哋講吓啦！
外賣公司招聘都有提到完成CBT course為招聘條件
英國只須一天就可合法揸125cc以下電單車
出賣年齡系列，「面對當年情~~真心說句~~」，當年華仔喺《烈火戰車》一句歌詞，燃起咗唔少男子漢要揸架電單車嘅雄心壯志。可惜礙於以前生活忙碌，而且街道狹窄、人多車多，實在唔係好適宜揸電單車。嚟到英國情況唔同哂，而且只要有當地私家車車牌，想合法地揸電單車絕非難事，只要完成需時一日，大概6-8小時嘅Compulsory Basic Training(CBT)，就可以駕駛125cc以下嘅電單車(motorcycle)，條件係要掛上「L」牌，有效期兩年，即兩年後想繼續揸，就要再上多次CBT course，當然你亦可以喺呢段期間，考返個真正嘅電單車牌。
上CBT course須知
上CBT course有咩要準備呢？由於學員本身已經有車牌，所以Trainer會期望佢認識揸電單車要遵守嘅主要規例，以及熟悉其他道路使用者嘅行為，否則Trainer有權叫佢唔好上堂。學員要自己準備頭盔、boots或結實保護腳跟嘅鞋、適合揸電單車嘅長褲和外套以及手套。首次上堂嘅學員唔需要亦唔可以準備自己嘅電單車，除非你本身已經可以掛「L」牌，為續期而上CBT course，先可以揸自己架電單車去。
CBT course一般需要上一日，循序漸進可以分為5個階段：
-
Introduction and eyesight check
-課程目標、合適衣著、視線法則
-
On-site training
-認識電單車如何運作、基本檢查、感受電單車重量和平衡
-
On-site riding
-剎車、轉波、觀察行駛狀況、全面操控
-
On-road training
-路面上法例、態度、速度、車距、位置、潛在危險
-
On-road riding
-日常路面駕駛包括交通燈、十字路口、行人過路處、上落斜、U-turn和急剎
每當訓練員認為你已經認識果個階段嘅理論，並展示出掌握到基本安全水平嘅技巧，就可以進入下一個階段，除咗最後一個階段「On-road riding」，必須要上足2個鐘，確保受訓者有足夠經驗。為確保安全和學員吸收到內容，當局限制咗上堂人數，「On-site」階段最多1個trainer對4個學員，「On-road」階段最多1個trainer對2個學員。
當你完成CBT course後，會獲得一張「certificate of completion」，就可以掛住「L」牌駕駛125cc以下嘅電單車，記住有效期係兩年，一係呢段期間考返個正式電單車牌，否則想掛住「L牌」繼續揸，就要再上CBT course嘞。
如何報CBT course
想報CBT course好簡單，上網可以完全搞掂，費用大約£140 – £200，視乎地點而家，有需要就介紹你去呢個網址睇吓https://www.rideto.com/cbt-training/london，又或者去到當局網頁輸入postcode，睇吓附近有咩CBT course。
其他相關文章: