剛剛移居到英國展開Chapter2生活，肯定忙到甩轆，首先當然要安排好居所，同埋下一代嘅學校和教育。安頓好後，就要為未來一段更長時間好好打算。除非已經擁有大量財力足夠餘生，否則長遠發展自己事業、有穩定收入必不可少。我哋為大家提供過唔少喺英國搵工嘅貼士，包括《英國搵工網站》、《英國人工水平-Check-a-salary求職資訊網站》、關於CV嘅《如何讓僱主找到你?》等等。但如果想喺自己從未接觸過嘅範疇，又或者已經有一定認識但唔知點入行，例如美容、維修、育兒等等，可以點做呢？英國同好多歐美地方一樣，講求專業資格認證，今次同大家介紹提供英國專業資格認證機構及課程嘅機構City and Guilds
City and Guilds背景
City and Guilds of London Institute係一間職業教育機構，亦係一間慈善機構，根據Royal Charter皇家特許狀而運作，成立於1878年，換言之已經超過一百年歷史，絕對唔使話擔心只係「空有其名」或者「商業掛帥」。City and Guilds當初由16間倫敦嘅同業公會牽頭成立，目的主要為手工藝和工程技術類型行業，訂立行內標準和專業資格認證，提高不同行業工人嘅質素和水平。時至今日，City and Guilds嘅目標基本上仍然一樣，正如佢自己所講「We help people to develop the skills they need to progress into a job, on the job and onto the next job」，頒發不同範疇工種或行業嘅專業資格認證，已經超過2000個，涵蓋工程、維修、美容、育兒等等等等，尤其是喺英國甚至世界其他地方，都獲得廣泛認同。所以想進入一個行業，先喺City and Guilds獲得相關專業資格認證，可以話係不二法門。
City and Guilds專業資格認證範疇
究竟City and Guilds提供嘅課程，完成後所頒發嘅專業資格認證，涵蓋咩工種和行業呢？講到呢個話題，就要先認識英國嘅Regulated Qualifications Framework(RQF)專業資格認證制度，RQF專業認證制度分為9級，由最初級嘅Entry Level起，之後為Level1→Level2→Level3…….一直至最高嘅Level8。簡單嚟講，Entry Level即係對有關範疇有最基本簡單認識，Level1可以執行最基本工作，Level2可以作出分析和構思，去到Level6等如有關範疇嘅學士學位，Level7等如碩士，Level8等如博士。
City and Guilds提供不同工種行業，主要由Entry Level至Level3嘅認證課程，有咩範疇呢？真係多不勝數，以「beauty」為例，喺City and Guilds網站搜尋，會顯示出10個有關beauty行業專業資格認證嘅results，涵蓋化妝、facial、美甲、髮型等等，由Entrey Level到Level6都有。如果搜尋「child」，有15個與兒童有關嘅專業資格認證，包括「Residential Childcare」、「Caring for Childen」等等，認證級別由level1至level5都有。正如前面所講，City and Guilds提供成超過2000個專業資格認證，係度講唔唒，大家可以根據自己想發展嘅範疇去搵搵。
如何報讀？
要留意City and Guilds嘅運作模式，佢係主要接受其他公司或機構向佢申請，經佢批核合資格，就可以提供有關專業資格認證嘅課程。所以你喺City and Guilds網頁搵到想報讀獲取專業資格嘅course後，請去網頁右邊，「Where you can take this course?」欄目度，輸入城市或postal code， 按下「Find a Centre」，就可以知道邊度上相關課程嘞！
City and Guilds官網: https://www.cityandguilds.com/