清明節令人想起墳場，我知你想講咩呀，一定係話「啋！呢啲嘢唔講得架！」、「唔老黎呀！」、「對先人不敬呀！」。的確我哋有好多故有思想，但既然嚟到展開Chapter2英國生活，不妨了解多啲英國文化。英國節日比較類似清明節嘅節日，可以話係萬聖節第二日，大家會紀念逝去嘅人，不過西方一般對墳場無咁多禁忌，尤其是英國，官方宗教為基督教，相信人死後會返到上帝身邊，所以墳場唔會有靈魂鬼怪，只是一個莊嚴地存放遺體，用來紀念先人嘅地方。喺英國有唔少墓地唔單止好有歷史、墓碑有很多藝術雕塑，而且風景都好靚添，喺倫敦就有「Magnificent Seven Cemeteries」，七個壯麗嘅墓地，仲係英國旅遊地點，有tour俾遊人參加架！
喺1800年至1850年，短短50年倫敦嘅人口由100萬人急增至230萬人(唔好同今時今日嘅城市比，果時已經好勁！) 果時住喺倫敦嘅人死後，都係葬喺教堂嘅後園，漸漸變成唔夠供應，非常擠迫，仲𧗠生傳染病、衞生等社會問題。英國國喺1832年通過法案，鼓勵在倫敦核心範圍以外建立私人墓地(隨住倫敦不斷發展，今時今日呢啲地方已經係核心區) ，結果喺1833至1841呢8年間，有七個呢類巳墓地相繼啟用。分別係：
- Kensal Green Cemetery (1833) – https://www.kensalgreencemetery.com/
- West Norwood Cemetery (1837) – https://www.westnorwoodcemetery.org/
- Highgate Cemetery (1839) – https://highgatecemetery.org/
- Abney Park Cemetery (1840) – https://abneypark.org/
- Brompton Cemetery (1840) – https://www.royalparks.org.uk/parks/brompton-cemetery
- Nunhead Cemetery (1840) – https://www.southwark.gov.uk/parks-and-open-spaces/parks/nunhead-cemetery
- Tower Hamlets Cemetery (1841) – https://fothcp.org/
直至1981年一位建築歷史學家Hugh Meller借用咗一套1960年嘅戲《七俠蕩寇誌》嘅英文名《The Magnificent Seven》，嚟叫呢七個倫敦嘅墓場，之後對倫敦或甚至英國人嚟講，「The Magnificent Seven」就係講緊呢七個英國墓地嘞。時至今日上面每個墓地，平均有20萬位先人喺入面安息，有唔少係已故名人，而入面大部分建築同墓碑都有極濃厚維多利亞式嘅風格。各個墓地都有舉辦一啲Tour或者講座去介紹自己嘅歷史，有興趣可以去佢哋各自網址搵搵！
