移民英國，唔少朋友都會決定買車代步，而編輯S都一樣，可惜由於自己經驗唔夠，係check車果時以為無問題結果就揸走，結果天氣一轉就發現有問題了，好在英國買車保養期仲未過，就拿拿聲拎返車行整，想知道編輯衰咩同埋點同車行Deal，就入黎了解下啦!
Table of Contents
買車的過程
編輯S同大部份人一樣，都係用Autotrader去搵車，之後睇啱就直接殺上車行睇車，不過因為編輯S窮，唔係揀Approved Used Car車行，而係揀地區車行，所以有叫埋朋友去一齊睇，最後deal埋之後包一個月車行保養，過幾日車行幫手update V5C及MOT之後就直接揸走，點知道3個人6隻眼都出事(其實唔關隻眼事)。
買車後發現的問題
話說去買車果時天氣都仲係好涼，平均溫度應該係10度以下，試車時都3個人都感覺架車係有冷氣，結果過左1個星期左右天氣變熱，就發現原來真係無冷氣了，朝早曬完架車一上車簡直係熱過火爐(真係唔好睇少英國個太陽)。一開頭以為係香港咁，冷氣係標準配置，點知爬左文先發現唔係，心諗大獲了，唔通買左架無冷氣嘅車? 仲有就係個司機位車窗要click好多下先開得盡，編輯S果一刻就懷疑自己係唔係中左伏喇!
出現問題後的處理方法
編輯S本來打算自己睇本車既Menu，不過無理由比左錢咁笨要自己攪掂，就Send email去車行問，好在車行好快打黎Follow Up，仲同編輯S確認架車係有冷氣配置的，就話應該係無雪種姐，叫編輯S搵車房去入雪種，仲同佢講 一般£50攪掂，叫佢入完同佢Claim返，心諗都好，唔駛揸返30分鐘車上去放低幾日比佢整，不過其實都怕佢走數，不過時間就係金錢，編輯S結果都係決定自己去搵車房入雪種，上Nextdoor問人介紹屋企附近車房推介，原來真係£50 – 60左右，之後網上book左時間就過2日出發了。車房開頭係報一個小時攪掂，所以編輯S都係搵個公園坐下等時間過，點知一個小時之後返上車房問，佢話都係入唔到雪種，應該有地方漏氣，叫編輯S比多一個小時佢地試下，編輯S立即心諗係唔係又比車房呃呢? 結果食完all day breakfast再返去，結果都係唔得，果刻編輯S都有心理準備要課金時，點知車房話唔駛錢揸返走，連要整漏氣幾錢都無同編輯S講亦無sell佢，係編輯S主動問佢先話估計要£450，當堂嚇一跳!! 車房位女士仲好好人幫架車掉埋頭，就Thank you and Goodbye了，態度十分之好。順便教大家入雪種嘅英文，係Aircon Regas或Aircon Recharge，上google search Aircon Regas near me就大把result了。
另外司機位車窗問題車行就教左編輯S Reset，點知又真係得，不過過一陣又Fail了! 心裡真係失望到一個點…
回歸車行處理及收費
之後編輯S返去email通知車行2樣都整唔掂，其實都有少少打定輸數，點知車行老細又係好快就打黎，叫編輯S揸返去比佢整，仲好禮貌咁夾時間添，之後過幾日就揸返上去比車行了。開頭話要整2-3日，結果都係好準時，星期1一早揸上去，星期3下午就有車拎了。上到去見到車行老細，佢一黎就比張單編輯S，WTF? £532.57??!?! 問下係唔係要比錢，點知佢話係，編輯S心入面即時 X 左出黎，不過佢接住話比編輯S知講笑姐，真係比佢嚇一嚇，佢話比張單編輯S睇係因為證明比真係整左同整左咩(單內明細下參考下圖)。之後上車試埋冷氣同司機位車窗無問題，編輯S再同老細吹左陣水就一鎊都唔駛比就揸走了。
後記及小插曲
上網睇過唔少評論，車行同車房係會夾埋一齊呃買家的，好在依間車行十分老實，跟進又快手，就算拎架車去入雪種果間車房都係好老實，最後真係鬆左一啖氣。過程中其實仲有一個小插曲可以分享下，就係去Nextdoor問去邊間車房Regas時，都有幾位英國網友話Regas黎做咩，都用唔到，其實講真真係剛上車果下熱，架車開返一排你開窗都有可能會凍，不過唔係有無需要的問題，係而原本係包左嘅問題，所以係英國買車前真係要問清楚架車有無冷氣，英國人可能真係唔Care的。仲有一樣好彩只係冷氣同車窗壞，影響唔到行車，否則我就要動用AA個Breakdown Cover了。以上只係個人經驗分享，希望對大家買車前有少少幫助啦!
英國揸車相關文章: