英國有成1500條河，合共長約20萬公里，想好好享受吓呢啲河流嘅明媚風光，釣魚絕對係最佳選擇之一。試諗吓坐喺河邊飲啖熱咖啡，望住碧波盪漾聽住流水聲三五七個鐘，小朋友喺旁邊草地野餐玩飛碟踩單車，有咩好得過呢個畫面。不過唔好以為喺英國釣魚，拎支魚竿、魚絲同魚餌等魚具去河邊就得，喺英國淡水垂釣，係要申請執照Rod Fishing License。無錯呀，要申請牌照呀，否則有可能被罰款£2500，仲要留意有禁止垂釣嘅日子。不過唔使擔心，申請一啲都唔困難，等我哋介紹俾你知啦！
英國休閒活動多，一定要講釣魚。喺英國嘅河流、湖泊或水塘釣魚，首先要認識附例《National rod fishing byelaws for England: freshwater fishing with a rod and line》
https://www.gov.uk/guidance/national-rod-fishing-byelaws-for-england-freshwater-fishing-with-a-rod-and-line
Table of Contents
英格蘭釣魚規則
附例將英格蘭分成咗六大區域，內容所講嘅釣魚規則喺呢六大區域全部都適用，簡略咁講吓重點：
- 每年3月15日至6月15日禁止釣魚
- 可以用網協助將釣到嘅魚拎上岸，但唔可以用索環、釣抓、火藥等工具
- 唔可以只放支魚竿落水走咗去唔理、一個人唔可以同一時間用多過4支魚竿、一個人用嘅魚竿放落水位置唔可以隔遠過3米
- 最後最重要係魚穫嘅限制，你釣上來嘅魚如果唔符合要求，係必須要在令條魚傷害最少下放返入水，如果符合要求，你就可以帶走，每人每日最多可帶走：i. 15條一般淡水魚唔長過20厘米；ii 2條河豚長度介乎30至38厘米； iii 1條梭魚唔長過65厘米； iv 每年6月16日前禁止釣走鮭魚(或者叫三文魚)，而且全年嚴禁買賣釣到嘅鮭魚
要記住以上講嘅六大區域，又再會有各自嘅附加規例，通常關於某啲水域一定唔可以釣魚、推魚竿魚餌等嘅額外規限、額外禁止釣魚嘅時間等等，所以都要留意呀！
Rod Fishing License
跟住就講Rod Fishing License，基本上喺英國除咗喺River Tweed釣魚，又或者出海釣魚之外，喺其他所有河流、溪澗、水塘、湖泊釣魚，一定要申請呢個牌照，分為以下兩種：
- 鱒魚、淡水魚(鮭魚除外)和鰻魚牌照 – Trout, coarse fish and eel license(簡單嚟講只可釣河魚)
- 鮭魚、海鱒魚牌照 – Salmon and sea trout license(可以釣河魚和海魚)
牌照〈1〉
牌照〈1〉容許持有人，釣非遷移性鱒魚和所有淡水魚(鮭魚除外)，可以用以下方式釣：
- 用一支魚竿在河流、水流、溪澗和運河釣非遷移性鱒魚
- 最多用兩支魚竿在水塘、湖或和池塘釣釣非遷移性鱒魚
- 最多用兩支魚竿釣淡水魚(可以俾多啲錢買容許三支竿)
牌照〈2〉
牌照〈2〉容許持有人，釣非遷移性鱒魚和所有淡水魚之外，亦可以釣鮭魚(即我哋會叫嘅三文魚)同埋海鱒魚，用以下方式釣：
- 用一支魚竿在河流、水流和運河釣鮭魚、海鱒魚和非遷移性鱒魚
- 最多用兩支魚竿在水塘、湖泊和池塘釣鮭魚、海鱒魚和非遷移性鱒魚
- 最多用三支魚竿釣淡水魚
不過記住如果用牌照〈2〉，無論有無真係去釣魚都好，每年都要在網上交一個catch return報告，內容包括你喺邊個水域釣過、釣咗幾多日、放生咗幾多條魚、啲魚幾重等等。
13歲以下係可以豁免唔使申請rod fishing license，13歲至16歲可以唔使錢申請junior license，16歲以上一定要申請而且要交費用，65歲或以上費用有減免。牌照亦按有效時間有唔同收費，有「1日」、「8日」同埋「全年」。以16歲至65歲有效期一年為例，牌執〈1〉可用兩支魚竿嘅費用為£30；可以用三支魚竿費用為£45；牌照〈2〉費用為£82。
收費詳情睇呢個網址啦！
https://www.gov.uk/fishing-licences/buy-a-fishing-licence
留意上述各類牌照喺你買果日30日內都可以開始用。至於點樣申請英國釣魚牌照，有三個方法，第一個可以喺網上啦，第二個可以去Post Office (千祈唔好搞錯Post Office同Royal Mail呀，唔知我講乜就睇返我哋文章《萬能的英國Post Office》啦！)，第三個方法就搵Environment Agency (電話: 0344 800 5386)。
不過有一件事要留意，上面所講嘅牌照，係唔包括可以喺一啲好出名嘅湖或河，例如泰晤士河釣魚架，要喺呢條咁「神聖」嘅河釣魚，係要申請比較複雜嘅牌照，牽涉到去City CouncilL申請，由於太複雜都唔太建議，有機會先再介紹啦！
🎣英國漁具
係英國買漁具非常方便，除左可以去大型漁具點購買外，Amazon UK都有齊哂基本的漁具套裝，當中有齊魚桿、魚絲、魚鉤、假魚餌。成套最平約£20起，有興趣搵best-selling英國釣魚工具套裝可以去以下連結睇睇。