同好多地方一樣，英國越來越多人選擇電動車Electric Vehicle(EV)，而放棄燃油車，作私家車為代步工具。根據英國當局嘅資料，今時今日喺英國每七部賣出嘅車，就有一部係電動車，情況可見一斑，而且喺英國政府基於環保不斷推出政策鼓勵下，可以預計電動車未來會越來越普及。去到英國展開chapter2生活嘅朋友，究竟應唔應該購買電動車作為代步工具呢？今次等我哋介紹一啲參考工具俾大家，等大家能夠作出最精明最適合自己嘅選擇啦！
應用程式「EV8 Switch」助你知電動車慳幾多
要選擇購買電動車定係燃油車，相信不外乎幾個考慮因素，一係個人喜好、二係成本、三係方便程度。第一個因素「個人喜好」，好難幫你決定；但第二「成本」和第三「方便程度」，有資料可以幫到手。事實上英國政府為咗環保，鼓勵居民選擇電動車，花咗唔少心思，除了推出稅務上嘅優惠，亦舉辦咗唔少campaign，等居民知道揸電動車嘅好處，令你大約知道改為揸電動車，究竟慳唔慳到錢，同埋方唔方便。
講緊嘅係英國政府推出咗一個名為「EV8 Switch」嘅app，佢可以幫手比較你而家日常揸燃油車出入代步，如果改為揸電動車，可以慳到幾多成本。佢嘅使用辦法係，先輸入你日常駕駛代步的燃油車資料，佢利用GPS和地圖，記錄你嘅行車習慣，一般以14日作為基本資料嘅標準，然後就會幫你分析，包括如果改為揸電動車，你可以慳到幾多油錢、幾減少咗幾多碳排放、幾耐需要充一次電、日常駕車路線附近邊度有充電站等等等等。佢仲會綜合以上資料，為你係咪適合改揸電動車，打一個分數「Switchability Score」，由low至high，令你更易評估吓自己嘅情況。 最正嘅係，個app仲可以向你推介，市場上有邊款牌子嘅電動車適合你，以及架電動車嘅出售價，係咪好方便呢？計我話，即使呢一刻無咩意欲轉電動車都好，download個app嚟分析吓自己情況，都已經幾好玩。
資助家居電動車充電站
除咗呢個咁好玩嘅app，英國政府亦有其他政策鼓勵人揸電動車。電動車最好充電嘅地方喺邊吖？當然係自己屋企嘅停事場，英國政府有一個叫「Electric Vehicle Homecharge Scheme」(EVHS)計劃，故名思義就係鼓勵人喺自己停車場安裝充電站，當局可以提供高達75%嘅費用。當然佢有一啲條件，例如係咩類型充電器、最低規格要求等等。
為電動車充電，最好嘅地方除咗係屋企，就梗係工作嘅地方啦！英國政府亦考慮到呢點，因此除咗EVHS，亦有另一個計劃「Workplace Charging Scheme」(WCS)，鼓勵喺工作地方安裝充電站，當然除非chaphter2朋友打算做老闆為伙計提供福利，否則呢個計劃好似唔關事。但想講嘅係可見英國政府有幾支持電動車普及，以及未來充電只會越來越方便。
上面兩個計劃，都由Office of Zero Emission Vehicle負責處理申請，有興趣可以去呢個office嘅網址https://forms.dft.gov.uk/ozev-authorised-installer-application/ 睇睇。
更多關於電動車充電資助，可以參巧我地另一篇文章《英國電動車充電站家居安裝資助計劃》
英國當局推廣電動車網站
最後大家對喺英國揸電動車有咩唔清楚，可以去呢個由Department of Transport負責嘅網頁https://www.electrifying.com/ 睇睇，上面除咗政策資料外，亦有齊電動車市場嘅最新動態，正所謂唔買都可以睇睇。