黎到英國，唔少朋友決定會生BB，最近編輯K 二小姐亦係4月尾出世，全程Made in UK。網上已經有唔少介紹英國懷孕、生仔過程及媽媽會等文章及短片，今次分享主要由編輯K個人角度出發，諗返當初既過程同疑問，不過唔會鉅細無遺講每一個過程，但係會列出18項(暫定)個人經歷及體會，亦有少量提醒，等大家有一個大方向，例如產前檢查登記、Midwife、檢查內容、幾時入得院、出院必備物品、登記GP及拎出世紙等等，由於洋洋三千字，將會分為上下集。
相關文章: 18+1個英國懷孕及生仔分享 經歷、體會及提醒(下)
Table of Contents
1. 產前檢查登記
係香港，發現懷孕係去母嬰健康院登記。係英國，係同midwife登記，留意唔係同GP登記。當時編輯K唔識野，走左去GP問，GP都係比一張Midwide登記表我，之後等收信做檢查。Midwife資料可以去以下NHS網站用Postal Code Search: https://www.nhs.uk/Service-Search/other-services/Maternity%20services/LocationSearch/1802
2. Midwife檢查地點
編輯K就被派左去Surgery，而剛好有一位住係London既朋友遲一個月懷孕，佢就被派去醫院入面既midwife。所以都係睇你住係邊。
3. 產檢內容
編輯K 大小姐係香港出世，根據記憶，英國產檢內容同香港公立醫院檢查內容大致相同。期間照左4次超聲波，其中2次係正常檢查，2次係因為個胎重量不足，額外被midwife安排去醫院再照。如果平時係midwife道檢查大概10分鐘就會完成，好簡單，都係問下你覺得點、度下肚圍及聽下BB心跳之類。
4. 照超聲波
去醫院照超聲波時，護士冇主動問要唔要知道BB性別，係要編輯K主動問護士，而且護士係會再三確認你真係想知先會話比你知。另外超聲波相係要畀錢買，價錢係£10，喺間房會即時print畀你，之後就要出到走廊繳款機自己畀錢，走果時記得唔好太開心唔記得左比錢。
5. 提供NHS證明
當編輯K去完醫院照超聲波之後，就收到醫院信件要求提供NHS登記證明，要提供的資料包括Passport copy, Visa status證明即係share code, 水電煤等地址證明及結婚證書。目的係證明你係有資格免費使用NHS Services。由於大家申請Visa果時都比左IHS，所以大家係有資格的。
6. 生產方法 可以係屋企生?
Midwife有提到英國生產係有幾個方法，包括自然分娩及開刀。自然分娩之中有分為順產同埋水中生產，而且仲可以揀係屋企生，不過好睇你運氣，如果係預產期之前出世好大機會都係要去醫院生。另外Midwife一般都會建議先以順產為先。依個決定係可以隨時改。
7. Midwife = 助產士
雖然midwife喺google中文譯名係助產士，不過要留意協助你生產嘅並唔係果位成日見你的midwife，而都係醫院嘅midwife or護士會幫你。
8. 有無得揀醫院?
要留意就算自己嗰區有醫院，唔代表可以喺本區醫院生，因為有d醫院係無產房的，有機會需要跨區，編輯K就係跨區了。Midwife一開始就會問你想去邊間醫院生，到時建議揀啲比較交通冇咁繁忙嘅地方，因為編輯K揀咗一間差唔多次次去都會塞車嘅醫院。依個決定係可以隨時改。
9. 作動點算好?
由於比預產期中左2個星期，當編輯K太太4:30am開始有陣痛時就打畀醫院產房(唔係打999, 唔係打111)，聽電話的護士會問你一大輪問題，包括有無穿羊水等等，最重要嘅係佢會問陣痛嘅間距，編輯K當初打去嘅時候已經係大概15分鐘陣痛一次，但係護士話咁早係仲未需要出發去醫院，仲叫編輯K當陣痛會五分鐘一次嘅時候先出發，而出發之前都仲要打比醫院。需知道編輯K需要去嘅醫院係30分鐘車程，聽到5分鐘陣痛先可以出發真係呆一呆，護士亦講到如果太早到係唔會比你入院，所以唔好諗住可以喺醫院病床上等，如果太突然既護士就建議打999。
10. 生仔過程
編輯K太太入到產房大約係早上6:15am，而編輯K亦有陪產，但估唔到連保護衣都唔需要換，可能因為生仔過程超快，編輯K太太6:48am已經生左。可以要求吸笑氣，全程護士都鼓勵自然分娩，甚至剪陰都無，聽講香港生仔一定剪。
11. 幾時出得院
編輯K太太生產完畢之後護士話大概留喺醫院六至八小時，睇下小朋友同埋太太傷口無問題就可以即日走人，我哋當時都打左個突，竟然係可以即日出院! 事實最後都係5pm左右就走左，係醫院時間唔夠12小時! 依個係順產情況下，有無開刀既朋友可以分享下幾耐先可以出院?
12. 出院必備物品(重要)
本來諗住出得院就可以抱嗰個BB走人，點知護士知道編輯K揸車，就話如果見唔到有baby car seat就一定唔會畀我哋走，又當堂呆多左一呆，因為從來無人講過，而且係香港亦都無咁既要求，不過朋友係London話midwife有講，可能因為佢地係第一胎，而編輯K係第2胎，所以以為我地知道。編輯K當時立即撲出去買，結果係去咗三間Halford先搵到，所以建議大家一早去Amazon買定，而且最好係手提拎嗰一隻(即係下面Amazon果幾款)，因為之後要去任何地方帶住BB去檢查，有任何醫院職員或護士見到你手抱BB，都會走埋你問你搞乜鬼，咁樣好危險之類，開頭以為揸車嘅時候先需要用，但係只要你喺醫院出現，你手抱住個BB就會有醫院職員或護士走過來話你好危險。
上集就講住咁多先，過幾日會Post埋下集，Stay Tuned!
相關文章: 英國產假法例