為咗保護環境減少廢物，英國同好多地方一樣，多年前已經開始推行膠袋徵費，英國今年2021年5月更加收緊咗，除咗每個膠袋嘅徵費大大提高，適用商店嘅範圍亦擴闊咗，只有少數情況下商店可以免費派發膠袋俾顧客用。嚟到英國展開chapter2生活，當然要清楚有關政策究竟係點，畢竟日常購物係經常會做嘅事，萬一果次唔記得咗自備購物袋，都要考慮吓應唔應該買個膠袋。今次等我哋同大家講吓啦！
徵費英格蘭平均每人每年超市僅用4個膠袋
英國自2015年推行膠袋徵費，當時每個膠袋single-use carrier bag收費為5便士，而且只適用於僱用了250人以上嘅零售商，換言之主要影響大型店舖好似超市。雖然係咁，但已經大大減少咗居民使用膠袋嘅習慣，由徵費推行前嘅2014年，英格蘭平均每人每年由超市使用140個膠袋，減少至每人每年4個，推算計咁多年來減少咗使用10億個膠袋，對減少廢物保護環境大有幫助。
英國膠袋徵費大幅增加一倍 涵蓋所有商店
為更加保護環境，英國2021年5月21日起，膠袋徵費政策進一步收緊，每個膠袋徵費由5便士增加一倍至10便士，而且涵蓋範圍擴大至所有零售商。不過喺某啲情況下，店舖仍然可以免費派膠袋俾顧客用，包括：
- 紙袋
- 用嚟裝煙或酒嘅密封袋
- 喺用嚟包裝食物、存在食品安全風險嘅生肉和魚、處方藥、刀片、種子、植物和花朵等等
雖然以上情況商戶可以免費派發膠袋，不過英國當局亦講明，鼓勵即使喺以上情況，商戶都可以唔提供膠袋，又或者繼續向顧客收取徵費。
英國當局預計，提高和收緊咗膠袋徵費後，未來10年徵費會超過3.31億英鎊，呢啲錢唔會俾返政府，而係落入零售商嘅袋，作為鼓勵零售商積極執行徵費嘅誘因，不過政府亦會定期查問零售商黠樣用啲錢。另一方面收提高徵費後，估計減少膠袋用量達到兩成，其中之前仍可派發膠袋嘅中小型商舖，更加會大減八成1。
英國零售商嘅「Bags for life」
無論為慳錢定為環保，作為消費者隨身帶住個可以重用嘅環保袋係最理想。事實上，英國好多零售商，唔單止會喺收銀處旁邊，擺放了環保袋俾唔記得自備購物袋嘅顧客買，而且亦推出咗「bags for life」計劃，如果你用咗個環保袋一段時間殘咗爛咗，你拎返去間舖頭，佢會免費換個全新嘅俾你，即係可以用一世，係咪好抵呢！再無藉口話咩「買一個環保袋都要成本，呢筆錢可能夠買好多個10便士嘅膠袋啦」！呢啲都係講笑，總之大家為環保，出多一分力啦！
資料參考: https://www.gov.uk/guidance/carrier-bag-charges-retailers-responsibilities
相關閱讀: