欖球唔單止係一項緊張刺激、令人熱血沸騰嘅運動，而且喺英國文化佔有非常重要嘅位置，好多日常生活、社會運作甚至政府措施，都受欖球比賽影響，所以話嚟到Chapter2英國生活，一定要認識英國欖球文化。
喺英國有句古老嘅說話：「Football is a gentleman’s game played by hooligans , and Rugby is a hooligan’s game played by gentleman.」意思係話，「足球係一項紳士運動，參與嘅係流氓；欖球喺一項流氓運動，參與嘅係紳士」。
唔熟悉英國Rugby文化嘅人，可能會問：「欖球員喺場上個個兇悍，又打到流哂血甩哂骹咁，佢哋點會係紳士呀?」
曾經同英國朋友傾呢個話題，佢話喺英國因為足球而引發嘅騷亂，歷史上何其多，但因為欖球比賽而引發嘅騷亂，少之又少，咩人係流氓，咩人係紳士，好明顯啦。佢之後就話你睇吓足球場上，「插水」、「拉人」、「起踭」、「飛腳」，乜陰濕招都有；反而欖球員一定係面對面「硬砌」，明刀明槍，防守攬跌人都會避開對手脆弱嘅位置例如頭部。我聽完覺得，雖然以上情況都係比賽規則造成，但都算係有啲道理。
「欖球都有『越位』?」
相信大部分人都知道打欖球目標，係拎住個欖球去到對面「達陣」，但有時見到成班球員攬埋一舊，球證又吹停，然後成班球員又「鬥牛」咁搶個波，呢啲規則係點嘅呢? 跟住落嚟同大家講多幾項簡單嘅規則啦！
- 用手傳球只可以橫傳，或向後方的隊友傳球。
- 可以用腳將球向前踢，等自己或讓隊友去追。
- 「Offside」：如果球員身處嘅位置喺持球隊友嘅前面，屬於「越位」，唔可以參與球賽。
- 「Tackle」：攔截只可向敵方持球球員進行，而且要針對肩膀以下的位置。
- 「Ruck」：當持球球員被攔截倒地，欖球在地上，隊友可上去支援，頂住對方球員，由持球球員嘅隊友執起欖球，繼續比賽。
- 「Maul」：當持球球員被對方球員截停，欖球仍在手中，持球者隊友可上嚟支援，兩排人鬥力試圖向前推進，直至個波由持球者向後交俾隊友，再繼續攻勢
- 「Scrum」：當出現輕微違規行為(例如向前傳波)、因「Ruck」或「Maul」而無法繼續進行比賽，球證會判「Scrum」。雙方兩班球員搭住隊友膊頭，好似「鬥牛」咁頂住對方班球員，由獲判發球一隊嘅球員，將個波拋入兩班球員中間嘅隧道，隊友用腳向後傳，負責拋波入去嘅球員去到隊友後方，執起個波傳俾隊友，繼續比賽。
- 得分「Try達陣 – 5分」
「Conversion加踢射門 – 2分」
(達陣後獲得的射門機會)
「Penalty罰球 – 3分」
(因對方球員犯規而獲得)
「Drop goal落踢射門 – 3分」
(比賽期間將欖球彈地然後射過H架上中間位置)
英國欖球文化必須認識的幾個字
- 「Betfred Super League」
頂級嘅英國欖球聯賽，叫Betfred Super League，有12支球隊參加，其中11支係英國本土球隊，1支來自法國。球季通常由2月至9月，每支球隊每季比賽29場(主場作客各半)，頭五名會進入季後賽，角逐最後冠軍。呢個網頁有哂所有聯賽嘅新聞，得閒可以睇睇認識吓。
- 「Magic Weekend」
2007年首次舉行，係Super League賽季一年一度舉行嘅盛事，通常喺五月發生，12支球隊會齊集喺一個球場，喺周末兩日時間互相對壘，勝負所得嘅積分計入聯賽成績，對球隊排名大有影響。由於12支球隊齊集一個地方，所以果度會齊集好多球迷同英國運動愛好者，好似嘉年華咁，完全符合賽會想推廣比賽嘅目標。
今年嘅Magic Weekend就定咗喺9月4-5號，喺紐卡素聖占士公園球場舉行，兩日六場比賽，最好嘅成人門票£110，最平£40，想感受吓氣氛可以去官網買飛。
- 「Playoff」、「Grand Final」
12支球隊經過常規賽後，排名頭五隊會進入Playoff，形式係淘汰賽，但排名較高嘅球隊輸咗，又可以與排名較低嘅打場復活賽，最後留低兩隊會打「Grand Final」，決定誰是總冠軍。
- 「St Helens」和「Leeds Rhinos」
兩支都係Super League嘅球隊，同樣贏過8次冠軍，其中「St Helens」係上年盟主。最緊要係佢哋啲product唔錯，尤其是啲運動裝備可以考慮吓！
- 「England National Rugby Union Team」
英格蘭欖球代表隊，每年都會參加六國聯賽，與威爾斯、蘇格蘭、愛爾蘭、法國和意大利競逐，代表隊每次有主場比賽，英國人都為之瘋狂。英格蘭代表隊喺世界排名長期處於頭五位內，主要同南非、紐西蘭、愛爾蘭、澳洲等國家競爭。四年一度嘅欖球世界盃，至今舉行咗左九屆，英格蘭代表隊最威威果次喺2003年捧盃。
- 「Betfred」
嚟緊三月廿五號對唔少英國人嚟講，係一個非常期待嘅日子，因為新一季頂級英國欖球聯賽 Betfred Super League開鑼。呢個球季因為疫情，推遲咗展開時間，終於同大家見面。希望喺英國嘅朋友，加深了解欖球後，喺Chapter2搵到多一樣生活興趣。