上集包括左12個小分享(包括產前檢查登記，作動點算好，幾時出得院及出院必備物品等等)，今集會再多6+1個分享，包括費用、BB黃疸、登記GP、申請BNO Visa及申請出世紙等。點解要+1，因為有一個重要事項編輯K未證實，就係申請特區護照問題，編輯K收到風，有香港人New Born Baby係英國申請特區護照遇到香港入境處要求補資料，當中既問題有機會令到小朋友未能成功申請到護照，變成無旅行證件，如果有讀者係英國申請特區護照，希望可以分享下有無收到依份文件及點應對。大家可以入我地個Blog睇睇果份文件(部份)。
Table of Contents
13. 費用?
整個過程由睇Midwife開始，全程都唔需要出示任何文件，就算可以出得院，都係通知護士就走得，直接行出門口就去人，無任何收費，之後過左成個月醫院寄信黎都係證明你係果道生仔，而唔係send invoice比你。由登記Midwife開始，除左買超聲波要錢，一鎊都唔駛比。(當然係因為已經比左IHS)
14. 初生嬰兒檢查
BB出世後喺醫院會即時有一系列嘅檢查，當中有包括聽力等等。之後返屋企後過兩日就會有護士上門檢查，主要係睇下小朋友體重、有冇黃疸、飲食及去廁所等情況。如果護士發現小朋友有黃疸，就有機會需要去醫院作抽血檢查。當時編輯K二小姐就有出現呢個情況，護士即時要求編輯K 下午就帶BB去醫院檢查。頭兩個星期都keep住兩至三日就會有人上門檢查，之後就會慢慢轉返去Surgery同埋GP。首次去GP檢查嘅時間大概係出世後六至八週，到時GP就會打電話畀你book時間，或者佢冇打畀你你就要自己打去。(前提係你登記到)
15. BB黃疸
由於已經唔係第一胎，所以編輯K知道bb有黃疸問題都唔係太擔心，就如上面所講，護士即時要求小朋友入院檢查。第一次去到大概係4:30pm，護士抽完血之後就問我哋會唔會等結果，時間需要兩至四個鐘，咁當然係返屋企等啦，冇理由坐喺醫院度戇居居。
結果大概9pm左右收到護士電話打嚟要求BB即時入院，因為黃疸指數超過300，咁唯有車BB同太太一齊入院，去到都成11點幾。由於編輯K太太係餵母乳嘅關係，所以需要留低陪BB。BB需要係一間6人病房照藍燈，燈箱隔離會有一張病床比媽媽休息，等媽媽可以隨時餵奶，因為準時食奶對退黃疸有幫助。經過咗一晚之後，第二朝再檢查，但係指數仍未有下降，所以再需要等六至八小時再檢查，來來回回幾次都有未跌返過300。由於喺藍光旁邊媽媽瞓得唔好，而且亦都準備咗幾支奶，所以就想膽粗粗試下問護士可唔可以先返屋企梳洗，一開始護士都話我哋醫院有得梳洗，可以唔使返去，但係其實係最想返屋企訓返一覺好既。最後護士容許媽媽大概11pm左右出院，而BB就留係醫院照燈，但媽媽必須要喺第二日中午前返到嚟繼續照顧BB。當晚編輯K就漏夜車咗媽媽返屋企，第二日未到中午護士已經打黎追。最後好彩同日下午第二次檢查已經話黃疸指數已經降低可以出院，結果住咗兩晚醫院就可以離開。又係咩手續同費用都唔需要比，同護士講聲就走得。
16. 登記GP
喺產房離開之前護士有建議我哋去登記GP，因為英國出世非英藉BB只有三個月免費NHS。護士亦有講明並非每間GP都可以喺冇任何證明文件(even出世紙)下一定登記到。而編輯K去返自己登記果間GP拎申請表，當時連出世紙都未有，向職員講明情況後，職員建議喺申請表上寫番有關原因就會幫編輯K處理，結果好彩係成功登記，過左2星期就收到NHS信。建議親身去GP Reception查詢。
17. 申請出世紙
出世紙需要同當地council申請，要就打去約時間及地點，不過由於編輯K要搵師傅改名，所以並冇第一時間就約，要留意小朋友必需要於42日內向council登記申請出世紙。當時打咗去council登記一心諗住喺自己嗰區拎出世紙，不過職員表示最快appointment差唔多要等兩個月先有。由於想快啲拎到出世紙登記護照同埋拎bno visa，所以就問咗職員最快可以幾時處理，同埋可唔可以去另一區攪，結果職員安排咗去隔離區，過2個禮拜就可以去登記，比原本喺自己區登記做咗一個月有多。申請過程只要父母其中一個人去就ok，帶去既文件好簡單，父母Passport，結婚証書，同埋小朋友Red book。過程大概15分鐘，編輯K加左錢要2份Copy，Total費用係£22.00，可以即時拎走。
詳細可以參考: https://www.gov.uk/register-birth
18. 申請bno Visa
雖然小朋友喺英國出世，但係由於雙非，即係父母都並非英國國籍，所以小朋友並非一出世就會獲得英國國籍，要等父母入籍後，小朋友就會同時獲得英籍。所以小朋友係需要申請bno Visa，喺冇bno or特衰護照嘅情況下，只要你有出世紙就可以喺網上申請。如果你會為小朋友拎特區護照，就可以用app申請，否則就需要去Visa Center。喺網上申請bno visa完成後就可以book埋時間，如果唔係用app申請，記得去之前要跟指示upload相關文件去UKVCAS Website。
NEW: 申請特區護照問題(未證實)
(頭盔Mode: 暫時拎唔到整份附件，而且亦未有最後申請結果，以下只係編輯K個人認為可能出現既問題)
係出文前一日，編輯K收到朋友係Whatsapp Share左2張由香港入境處Send比佢朋友的Email及附加文件關於為英國出世小朋友申請特區護照既Cap圖，當中附加文件中問題1+2+3條可能有有機會影響小朋友是否可以成功申請，不過截文之前當然未有結果，如果有讀者係英國申請特區護照，希望可以分享下有無收到依份文件及點應對。
雖然大家未必真係好想要，但係在現實情況下，父母都係香港人就算拎住BNO Visa，小朋友係英國出世都係跟父母香港國藉，所以係未入英藉下，特區護照係小朋友唯一既旅行證件，當然如果你可以忍住4-5年唔出國，咁只要父母一拎到IRL小朋友就可以入藉同埋拎英國Passport了。其實小朋友咁細個，都去唔到邊道玩，而且英國其實都勁多地方可以去，玩個4-5年應該唔係問題，除非你有需要返香港or去其他地方旅行等等，否則可能真係可以唔申請特區護照?
左圖係email內容都係搬返d法律出黎講點先有Chinese Nationlity，右圖就係一份問卷，我地試下答下睇下有咩問題
問題1
申請人現在是否在其出生地定居? 否, 因為BNO Visa未有定居資格
如果答案是「是」，請說明他以什麼身份在其出生地定居 – 好明顯依個我地唔揀得(雙非)
如果答案是「否」，請說明他現居何處及以什麼身份在當地定居 (請附上旅行證件及簽證或居留許可證的副本) – 正常小朋友係要申請BNO Visa，如果填BNO Visa，但係香港唔承認BNO咁如果照實填，結果會係點呢?
問題2
申請人在外國出生時是否獲得外國籍? – 好明顯係否，因為雙非(父母都未有英國國藉)，所以就算係英國出世，小朋友唔會一出生就係英藉 – 詳細可以參考英國政府網站 – Apply for citizenship if you were born in the UK
如果申請人沒有在出世時獲得外國國籍，其後是否加入或取得外國國籍 – 只要父母拎左IRL，其實係英國出世既小朋友就可以直接入藉，就算父母拎唔到IRL，小朋友只要住到10歲就有資格個人申請入藉，所以應該係答「是」，定係答住「否」先呢? 理論上今日唔知聽日事嫁嘛, Right?
如果答案是「是」，請說明所入籍國家名稱 (請附上入藉證書及護照副本)- 好明顯係英藉，不過2樣證明文件都暫時唔會有，所以上一部份係唔係應該揀「否」呢?
問題3
申請人在外國出生時，其父親是以下述身份在外國居留(請附上父親的旅行證件及簽證或居留許可證的副本) – 如果比BNO Visa佢，香港又唔承認，結果會點呢? 留意今次用字係居留，而唔係定居
甲: 以長期/永久居民身份定居 (獲准定居日期:___) – 正路應該唔係揀依個，都係因為Bno Visa都係沒有定居身份
或
乙: 以下述形式居留
「工作」/ 「受訓」/ 「讀書」/ 「旅遊」/「 其他(請詳述):_______)」
(獲准居留日期:_____ 居留期限有效至:________) – 好明顯大家都係因為Bno Visa而獲准居留，係唔係應該揀其他? 之後照寫Bno Visa限期? 都係果句, 香港政府唔認BNO喎
由於暫時拎唔到成份問卷，所以唔知道之後仲有問題係要關係到BNO Visa，估計應該係問完爸爸就會問媽媽…如果有讀者有一份完整既，可以Facebook Inbox分享比我地嗎?
後記及特別發現
純粹編輯K感覺，係整個懷孕過程接觸到的英國Midwife、醫生及護士，一般都十分有禮貌，而且態度十分親切，產後上門檢查服務更加係十分周到，唔駛元氣大傷既媽媽同得幾日大既小朋友要周圍走。
另外有一樣比較特別的發現，由於編輯K太太英文一般，大部份時間都係編輯K代打/覆電話，但係好多時醫務人員都會要求親口同太太傾/答，而唔係由爸爸代答，因為始終最了解自己狀況都係孕婦本身，而且亦係避免另一半太dominate令情況有機會被誤判，所以準備做爸爸既你準備做傳聲筒啦!
最後就係申請特區護照，編輯K都係帶返個頭盔先，有可能照直覆，最後入境處都會批比小朋友呢? 又可以只係抽樣審查。如果編輯K有任何Update，之後再係Facebook Update大家。
相關文章: