係開始之前，事先聲明，以下內容只是編輯S幫寶貝女搵Nursery的經驗分享，而不是教大家點揀Nursery，主要係由搵料到成功報名的過程，同埋返學之後的轉變。
編輯S的寶貝女今年已經3歲，由於之前COVID-19疫情嚴重，所以無考慮之餘，其實都因為學校停課而無得報。到5月底疫情稍微回落後，就開始同媽媽一齊開始搵Nursery，以下係搜集到的資料及個人選擇Nursery的原因。
Table of Contents
英國Nursery的免費Children Care
係英國，所有3-4歲(5歲前)的小朋友都可以享有英國政府提供的最多一年570小時的免費Childcare學費資助，即係38星期每星期用15小時的上限，不過點安排返學時間無限制，你可以安排一星期3個(日)5小時或2個6小時。一般係要已向政府登記的學校Term Time先有得Claim，基本上係學校會幫你報的，所以你可以放心。其實唔少Nursery幾個月大的BB都已經可以返，不過聽唔小家長講佢地小朋友都係18個月左右開始，不過即係要自費喇，收費方面以下再分享。另外如果你睇政府網站，其實小朋友2歲就可以申請同埋最多一個星期可以有30小時免費Childcare資助，不過屬於Public Fund，大家拎BNO Visa的話正常就申請唔到了。
詳細可以參考政府網站: https://www.gov.uk/help-with-childcare-costs/free-childcare-and-education-for-2-to-4-year-olds
Nursery報名經驗
先分享資料搜集及報名過程，初來報到，人生路不熟，求人之前都要做d資料搜集，第一時間當然去左搵學校神器Locrating睇下啦，之後搵到心儀果幾間就用Google Map睇下附近環境，再去學校網站及Facebook等睇下相同Study下背景。之後就先Send左email去問學校有無位、返學時間及收費等等。
收窄左範圍就去Nextdoor及Facebook Group問下街坊附近學校的口啤，點解唔一開始就問街坊? 因為話哂都係自己小朋友，當然唔可以做伸手黨啦，否則人地講邊間都唔知就無得討論。
最後綜合街坊意見同埋個人選擇，結果揀左間Outstanding的，其實編輯S無話一定要揀Outstanding學校，只不過咁啱啱哂要求，最重要係咩呀?! 就係仲有位，唔駛排Waiting List囉! 揀學校原因就下面再分享。
不過於編輯S太忙，結果剛好過左Summer Term的報名Deadline，而心儀依間Summer Term係無位，結果為左寶貝女快d適應群體生活，係新學期開始之前，就報住另一間返住先6-7月short term先，9月先正式番Outstanding果間。
有一樣好好嘅野編輯S想分享，就係查詢學校報名有關事宜時，好多時我都未出口，學校職員已經會問你係唔係只想用果15小時，就算編輯S答“係”，職員態度都完全無改變，因為對佢地黎講係好正常的事，所以如果你只係想小朋友返一星期15小時，真係唔需要怕羞直接講，咁就可以更快幫你搵出有無位，唔駛大家浪費時間。
報名過程2間都係填表就OK，不過有一間要親身交，一間就可以經email交，不過2間地址同身份証明都無需要提供。可能有D學校需要，到時跟返學生要求就OK。另外報完名要比留位費，大約係幾十鎊。
選擇學校的背景及原因
一開始編輯S同太太係打算搵間最近的，無論係good 或者係outstanding都ok，因為如果可以同住係附近的同學仔一齊步行返學或放學，或者係附近公園玩，建立友誼的速度係可以快更多，而且亦有機會認識及與其他家長交流，可以幫助自己同小朋友更快融入英國生活。
第二就係學校環境，當做資料搜集時，你睇學校環境相就知道空間大約有幾多，編輯S想寶貝女多D戶外活動，所以就target d outdoor空間比較大的學校。同區有另外一間Outstanding Nursery有個大草地同埋森林係旁邊，睇相會見到學校會不時帶小朋友出去玩同探索，真係好吸引，可惜依間係全區最受歡迎，編輯S認為只係Nursery，主要都係返學學習群體相處，無話邊間非讀不可，就果斷Skip。
第三就係老師，當然未返過就唔會知，不過係Nextdoor同埋Facebook問街坊時佢地都唔會吝嗇分享，有d家長話佢2個唔同歲數的小朋友都係跟同一個老師，關係十分好，就知道依間學校老師的年資都比較長，而最後揀新學期依間都因為同學校Admin傾電話時了解到佢地最短年資的老師都係7年，經驗方面應該有返咁上下。
可惜由於編輯S係住新區，所以步行距離內都無Nursery，結果揀邊間都無所謂了。但係!!!! 當編輯S寶貝女返左Short Term 2個星期之後就認為，學校附近有停車位係十分重要，因為Short Term依間街泊位係極少，早上返學都仲有機會有位，下午放學就未必有位了。不過我見到有少量英國家長會泊係雙黃線門口等放學，不過編輯S就唔係好敢搏了。好在，睇返9月開學果間附近有一個大免費停車場，咁都無咁擔心，起碼小朋友返學放學出入都安全少少。
不同學校的收費及返學時段
編輯S主要Target 左3間，一間係當地知名大學附屬Nursery，一間係當地Grammar Sch附屬Nursery，一間係喺本區有幾間分校的Nursery，而新學期果間係後者，而3間返學時間同收費都有唔同，返7:30am除左挑戰小朋友仲係挑戰家長。另外要留意就係你可以揀要唔要有Break，如果參考圖2 Option 7，係有3個Break唔駛返學的。即係你小朋友係要返42個星期，如果按38星期每星期用15小時的上限，Option 7即係一個星期返3日5小時，仲有4個星期12堂就要自費了，總數係£396。另外每間學校都可能有雜費要另外比，亦有遲到費等等，記得要睇清楚。
圖1: 知名大學附屬Nursery
圖2: Grammar Sch附屬Nursery
圖3: 本區有幾間分校的Nursery
正式上學前準備
返學前一般都有Settling Session比小朋友，通常都係2-3堂，時間會比正式上堂時間短，第1-2堂長度可能會唔同，目的係比小朋友學習同父母分離，有D學校會接受家長係Settling Session頭1-2堂坐係旁邊睇小朋友上堂，一來比家長知道上堂情況，二來比小朋友係家長在場下熟習新環境加強安全感。有學校Settling Session係需要按時間收費的，詳情請向學校查詢。
另外唔少學校都會透過手機App比返上堂報告同埋相片比家長，了解小朋友上堂的情況，記得要登記呀!
返學後的改變
老師建議可以繼續講中文教中文，唔需要特別迫小朋友學英文，因為最終佢都一定會識，因為整個環境都係用英文，所以係屋企同小朋友溝通記得keep住用母語。的而且確小朋友真係學得好快，編輯S的寶貝女返左2堂已經學左唔少英文，例如Come On, You ok? , Bean等等。不過用中文問寶貝女咩係Bean佢反而唔知同你點講，依個時候就可以教返佢中文了!
總結
雖然3歲唔一定要返Nursery，不過編輯S強烈建議揀間近近地的都要試下，係英國政府資助下，返學基本上無咩成本。除左為左小朋友適應，同時家長都可以有返d Me time(哈哈!)，實在係阿媽阿爸仔女WinWinWin局面呀! 以上只係個人經驗分享，各個Council及學校等都可能有不同安排，如有問題請向有關單位查詢作準。
教育相關文章:
BNO移民英國讀書APP介紹GCSE網上學習資源 – EdPlace