大部分移民英國嘅朋友一開始都會先以租樓落腳，租約完左之後可能會買樓或者在搬去其他地方，正好本網站主編3月中剛好完約及搬屋，就趁呢個機會同大家分享下退租要留意嘅地方及搬屋有關費用。
Table of Contents
退租需要留意的地方
通知期
首先一定係要睇返合約內規定如果唔續租需要提早幾多通知地產代理或業主，主編合約係規定須於退租前30日前通知，因為主編當時仲係搵緊樓租，結果當搵到租盤之後只剩低唔夠30日，所以當時地產代理同主編講要按提出退租嘅日子計番30日先可以正式完約，即係住多咗嘅日子需要額外交租。不過好彩主編搵到朋友接手而家間屋，而且可以喺主編租約期滿一個星期後入住，所以地產代理同業主傾咗可以畀主編按原定完約日子退租。
通知方法
除咗日子之外，要留意係通知地產代理或業主嘅方法，主編曾經面對面同埋email都提過會退租，但係地產代理要求主編要寫一封信加埋簽名先確認退租通知，咁最後都係用word file打封信之後簽番個名send返畀地產代理就ok。
租約完結前的上門檢查
喺當初未搵到樓未決定是否續租之前，地產代理大概喺完約一個半月前已經嚟到上門檢查，當時有講過如果續租嘅話就唔需要再簽fixed term, 會換成Rolling Contract, 即係每個月定時交租同埋退租需要30日通知，不過並非每一間地產代理都會將合約轉為Rolling contract，有機會需要租客再簽fixed term都唔出奇，咁到時大家記住同代理傾下啦。另外業主亦都可以唔同你續租，所以如果想續租就最好早D同地產代理或業主講喇! 當然如果你住到間屋Condition好差，業主唔同你續租既機會都大。
被扣deposit的情況
由於主編有養狗，所以確定退租之後地產代理第一樣就同我講需要扣150至200鎊deposit作為地氈深層清潔之用，當時主編都打咗個突，但係諗諗之後，其實人哋畀你養狗要做返清潔都好合理。當然你可以唔接受地產代理提供嘅價錢，但係就會變成需要你自己出去搵洗地氈公司，問題係喺唔少網上討論區都有網友分享過，明明有搵專業公司嚟做清潔，退租時就算出示買有關收據，但係地產代理都唔接受，原因係達唔到佢哋要求嘅清潔standard。結果主編廢事有爭拗就決定交畀地產代理代勞並直接喺按金扣除有關費用。雖然地產代理講係要150至200磅，但最後出單只係扣咗125磅算係有啲安慰。
Professional Cleaning or End of Tenancy Cleaning
另外大部分租約都會要求租客退租之前要做professional cleaning或者end of tenancy Cleaning，一開始主編太太認為自己平時執屋都好乾淨所以冇諗住要搵人做清潔，但係其實主編太太粗身大細所以主編都係決定搵人嚟做清潔。為避免地產代理唔認數嘅問題，結果係請地產代理介紹佢哋平時用開嘅清潔公司，主編間屋兩房一廳比較細，清潔公司上門報價之後回覆清潔需要六小時，收費總共係£225。
一開頭主編都認為好貴因為當年主編搬入之前有搵人做全屋清潔都係£150左右，結果當搬屋嗰日啲工人出出入入而且將啲雜物搬嚟搬去其實已經搞到周圍都係垃圾同埋踩到黑曬，嗰下當堂立即覺得值得曬。由於喺完約之前留咗幾日做清潔，所以喺清潔公司完成之後主編導有特登返去睇睇，結果都清潔得好乾淨，包括窗戶內外，爐頭，焗爐，雪櫃，洗衣機，發毛地方，浴室等等，而清潔姐姐亦都有sms特別提醒某些地方有機會會畀地產代理扣按金，不過好彩最後都係冇事。
相關閱讀: 租約完結要Deep Clean 英國家居清潔服務公司簡介
退租驗屋日 + 牆壁補救小貼士
退租當日就約咗地產代理返去一齊驗屋，其實有幾個位主編係有啲心虛，特別係因為之前用blue tack貼咗阿女啲畫作喺牆上，點知搣咗啲blue tack之後竟然有啲刷唔甩嘅積。主編太太就諗住自己補油但係又唔好意思直接問地產代理油漆顏色，同時又怕又要買一大罐油自己開。好彩去行The Range果時發現有啲細支嘅油漆測板賣(Tester Pot)，仲要係買2送1，結果來回買咗六支之後終於配得對色，雖然效果並唔係完美，但係如果你唔知道嗰個係保油其實都唔係幾睇得到，算係提供比大家一個補救小貼士，最終地產代理check樓嗰時係過關。
抄錶找尾數
另外記得check樓嗰日，抄低最後電錶，煤氣錶同埋水錶嘅度數。一般地產代理會幫你報畀有關公司你已經搬走，而最後帳單寄去你個新地址。不過最好問問地產代理會唔會幫你報，否則自己上網報都好容易，費事之後唔記得收數，有機會影響你credit record。
盡早通知問題
如果間屋有問題，而你亦有同地產代理保持聯絡並通知佢哋，一般退租check樓時都唔會額外扣你deposit，就好似主編間屋浴缸底漏水漏到樓下個廳個角有少少發霉，而浴室抽氣扇就由於屋頂有少許漏水又係有一灘水漬，結果都係冇事。因為根據租約，關於結構上嘅嘢整唔整係由業主決定及負責，但租客發現有問題嘅時候一定要盡快通知。
退租總結
由於主編都算錫住嚟住，亦有搵咗地產代理介紹嘅清潔公司，好彩最後只有洗地氈被扣咗百2磅，地產代理亦於三個工作天後將按金過戶到銀行。當收到最後帳單畀埋錢之後就算完成整個退租過程。
本來想同一篇寫埋搬屋分享，不過不知不覺已經寫咗1800字，都係留返係下集出，想知道主編搬屋用左幾多錢，就敬請留意Update喇!
1 留言
Very useful
Thanks
留言已經關閉。