想起初初移民到英國，無床係第一大痛苦，無Sofa可算是第二大痛苦，日日坐係地下揀傢俬買傢俬砌傢俬真係坐到Pat Pat痛，所以第一篇入伙介紹就係講床褥，今次終於到講Sofa喇，大家係英國買Sofa前可以考慮下有以下唔同特色及定位的品牌，亦會同大家check下平均出貨時間，買之前當然最重要係睇下邊間有Discount同格價啦!
IKEA同Argos依d我就唔多介紹喇，立即睇下有咩其他選擇啦!
Table of Contents
英國Sofa種類
雖然大部份人會叫Sofa，不過其實係可以再細分少少的，如果去到專門賣Sofa的鋪頭，職員可能會用唔同英文表達唔同種類的Sofa，如果知道定就可以快速應對了
Couch – 來源於法文，係有「躺下」的意思，即係一般深度比較深亦較柔軟的Sofa，可以比你舒服的躺平，通常都會配埋Cushion，有機會係有用彈簧製造。
Sofa – 來自阿拉伯文，同以上相比，Sofa主要真係以「坐」為主要目的，唔會好似Couch咁柔軟，比較正式，Size通常大張過Couch。
Lounge – 都係來自於法文，有Long Chair的意思，比起Couch同Sofa更大更長，提供更多坐位。
英國Sofa的材料及Style
係香港最興的一定係真皮sofa，易清潔，又舒服，英國當然都有得賣。不過係英國，編輯夠膽講最popular嘅係布Sofa，因為真皮sofa坐上去真係會凍，同埋價錢相對高，而且英國人愛養寵物，如果買真皮Sofa有機會比毛孩刮花。布Sofa的話就算幾時坐都唔會凍，雖知道編輯執筆之時係6月尾，夜晚的氣溫都只係有12度。英國布Sofa一般都係用麻布，亦都有絨布選擇。另外都有人造皮Sofa，又唔係特別平，所以編輯個人就不考慮了而Outdoor Sofa又係另一回事了，留返以後再講。
設計方面，北歐簡約Style、Modern Style、美式Style等都有齊，不過會多左一款係香港比較少見的英國田園Style，以下有online shop可以揀訂做依個Style。
不過英國Sofa比較少有儲物空間的設計，但係Sofa床選擇都唔少，如果有房多要黎招呼朋友，可以考慮買Sofa床。
英國Sofa Online Shop
基本上比較大型的Sofa鋪頭都會有Online Shop，另外Online Shop的好處係一定齊款，就算英國地方咁大，不過都無咩可能一次擺幾百款係道比你睇。係英國網上購物係大眾的習慣，而且退貨條款及安排等已經好完善，所以唔駛怕係英國Online Shopping有問題。
Sofa.com – 訂制之選
用得依d大Domain Name既公司都唔會細得去邊，英國唔少傢俱店舖都係賣現醒既多，點解? 因為地方大囉，點擺都得，當然Sofa.com都有現醒賣，不過Sofa.com係少數有訂制服務的Sofa公司，而且支架會有一世保養，不過要留意交貨期要8-10星期(現醒1-3星期)，而且運費要£50，不過就會包埋裝崁。定價方面係中上，另外亦有賣檯櫈、床褥床架同埋戶外Sofa。Trustpilot有超過3,234個Review，分數係4.6/5。有7間showroom。
Made.com – 編輯推介
https://www.made.com/sofas-and-armchairs/sofas
無錯，又係佢呀，之前床架都介紹過依個品牌，編輯S張Sofa都係喺依道買。Made.com款式唔算特別多(其實都有3百幾款)，不過設計比較有Style，而且大部份都有多個顏色選擇，價錢偏中上，不過最平2人Sofa £149都有。最好一樣就係Sorting可以按Dispatch time黎排，又可以睇到有幾多現貨，都有幾十款可以一個星期內送貨，最快可以3日，如果無現貨就要最少2-4星期了，運費£39。Trustpilot有超過88,000個Review，分數係4.3/5。有2間Showroom。
DFS – 全面之選
英國最大專造Sofa的生產商及連鎖店，產品由平都貴，任何Style都一應俱全，仲要係Made in UK。運費連安裝£69，不過交貨期要10-14星期。如果剛移民就買佢應該等到頭都長，不過下次要買就可以考慮。有118間實體店。Trustpilot有超過107,961個Review，分數係4.7/5。
ScS – 100年歷史的Sofa專家, Trustpilot 28萬個Review
ScS stand for Sofa Carpet Specialists，係已經係100年歷史的英國Sofa及地毯專家，標榜Made in Britain，20年支架保養。產品選擇勁齊全，價錢豐儉由人。星期一至五送貨要收£69，星期六就要£79，不過包埋安裝同埋收走包裝物料，送貨日子按item check。Trustpilot有超誇張的280,173個Review，仲有4.7分添，質素有保證。有超級120間實體鋪。
Sofology – 型格之選
睇網站風格就知道係行型格路線，價錢中上，最平£499起，大部份都要£1000以上。用傳統工藝人手做Sofa，所以交貨時間平均都要12-14個星期，都係20年保養。價錢已經包埋Standard 星期一至五送貨的運費，如果想Weekend送就要加多£40。Trustpilot都有140,956+個Review，分數4.5/5。有50間實體鋪。
Homebase – 性價比之選
https://www.homebase.co.uk/storage-home/furniture/sofas-sofa-beds/sofas.list
Homebase係一家英國傢俱連鎖店，產品性價比高，Sofa選擇都有百幾款，£200的款式已經唔錯。如果係英國Online買得野多，會發現唔係間間都可以揀送貨日子，不過Homebase就可以了，不過要加£6，可以接受啦。Trustpilot有超過60,349個Review，分數係4/5。有超過150間實體店。
Oak Furniture – 實木傢俱之選
https://www.oakfurnitureland.co.uk/category/sofas/
Oak Furniture主打實木傢俱，亦都有Sofa賣，編輯認為Style比較普通，不過各花入各眼嘅，但係其他實木傢俱真係幾靚的。價錢中上，7-14日送貨，送到門口唔入屋就£12.99，唔揀日子£24.99，揀日子送£49.99，送埋入屋砌埋掉埋包裝垃圾就£99.99。Trustpilot有超過112,375個Review，分數係4.3/5。有78間實體店。
Furniture Village – 高級之選
https://www.furniturevillage.co.uk/sofas-and-armchairs/sofas/
英國最大獨立傢俱連鎖店，產品quality較好，所以定價都會偏高，Sofa最平要5百幾鎊，不過有20年支架保養，可以趁佢做Discount先黎去買。大部份Sofa都要10個星期以上交貨期，運費£60包埋裝嵌。Trustpilot有超過25,340個Review，分數係3.7/5，價錢貴就一般期望比較高。有54間實體鋪。
Sofas and Stuff – 全人手製造及英國田園Style
https://sofasandstuff.com/3-seater-sofas?filter=3se
Sofas and Stuff係Family Business，不過主打高檔訂製服務，用料上乘，英國國內全人手製造，價錢一定會係高，3座位最平都£1,499起跳。網站介紹圖片有唔少係英國田園Style，其實配返地毯同埋紗質窗簾真係十分英倫Style，想試下英國工藝的可以揀佢。£69運費，不過買得依D都係濕濕碎啦，出貨時間12星期。Trustpilot有超過2,690個Review，分數係4.3/5。有16個showroom。
Designer Sofas 4U – 主打英倫風真皮Sofa
www.designersofas4u.co.uk/sofas-and-living-room
另一種英倫風，主打全人手製造真皮系列Victoria style Chesterfield Sofas，唔少知名品牌有用佢地的產品及服務，例如Natwest Bank、ITV、Legoland、仲有曼城同利物浦足球隊。價位平均都係£1000起跳，不過其實真係幾有型。Trustpilot有超過3,182個Review，分數係4.3/5。只有Online Store。
Wayfair – 超多Sofa選擇, 免費及最快送貨
https://www.wayfair.co.uk/furniture/sb0/sofas-c1772837.html
之前已經介紹過Wayfair – 有需要大家可以睇返英國網上家居用品專門店 Wayfair。Wayfair Sofa選擇超過3200款，Free Delivery之餘仲有唔少款式可以2-3日就送貨。
總結
其實幫新屋設計係幾好玩，雖然揀嘅過程一定會好苦惱，不過見到屋企變成你想要的風格，立即可以加強歸屬感。暫時介紹住咁多先，如果大家有好推介不妨留意分享。
買傢俱相關文章: