Table of Contents
萬般帶不走 唯有「鼻水」隨身？ 2成3英國人都有咩困擾？Hay Fever 花粉症
英國的花粉症非常普遍，唔講唔知，係英國有23%嘅市民都被不同程度嘅Hay Fever困擾(中文是”花粉症”)，即將到英國展開新生活嘅你準備好預防未?
花粉症 Hay Fever
各位有鼻敏感嘅朋友，揮揮手！香港街道狹窄，人多車多，空氣污染猶如家常便飯，令到唔少香港人都有鼻敏感。小鮮肉由細到大就已經有幾嚴重嘅鼻敏感，朋友見到我鼻敏感發作「si si syu syu」，以為我有乜事，我就最鍾意講笑咁講我個鼻有「春秋二祭」，即每逢春天同秋天轉天氣，鼻敏感就會發作又痕又癢，不斷流鼻水打乞嗤。嚴重到試過要食現成抗敏感藥，但覺得食完成個俾人會吽吽哋，所以盡量都唔食。
花粉症係英國非常普遍– 約23%人口受花粉症困擾
嚟到英國展開Chapter2新生活，諗住終於甩難，地方大，空氣好，唔使再有鼻敏感。點知⋯⋯ 幾年前第一次嚟過春天，個鼻又再嚟料，勁痕勁癢，喺間餐廳流鼻水同打乞嗤，搞到我都好鬼尷尬。英國朋友仔見到我咁，就同我講「Hey ! fever」我話我無發燒，係鼻敏感啫，佢又再話「Hey ! fever 」，心諗你咁煩架，都話唔係咯。再講講先知道，原來佢講緊「Hay Fever」，即係花粉症。據報英國一項調查，有大約23%嘅英國人，每年都出現花粉症，通常喺初春開始，嚴重嘅去到深秋先至結束。花粉症嘅成因，係對空氣中飄浮嘅花粉敏感，可以喺對一種花粉敏感，又可以對多種花粉。喺香港有鼻敏感，又唔代表去到英國一定有花粉症，主要視乎係咪有同一樣嘅致敏。
Hay Fever症狀係點?
之後自己做吓research，知道花粉症嘅徵狀，都係打乞嗤、流鼻水，耳鼻痕癢🥵，皮膚發紅，甚至發燒。花粉症基本上都係無得根治，可以搵醫生測試查出對邊隻花粉係致敏原，但好大機會無結果，因為致敏原可以有成千上萬種，即使搵到又可以點，一出街咪又會遇到，除非一步都唔行出街嘅啫。
咁係英國有花粉症咪無嘢可以做？
當然有，當中包括遠離致敏源、過濾空氣、藥物舒緩以及保持身體健康。
遠離致敏源
又唔係嘅。首先可以用孫子兵法都勁果招—「三十六著，走為上著」—「避」🏃♂️（講笑，《孫子兵法》無呢招）。英國嘅天氣預告，一般由三月開始，就會提供花粉含量預測“Pollen forecast”，分為不同級別，係嚴重級別嘅日子，咪少啲出街囉。如果非出門不可，最好戴返口罩(當然喺宜家時勢，點都戴口罩，但日後疫情減退，會唔使再戴架嘛!）
英國人會利用air purifier空氣淨化機過濾致敏源
除左逃避，大家可以考慮用空氣淨化機(又稱空氣清新機)去過濾空氣中的污染物及致敏源。當然大家購買時要考慮型號是否得到HEPA認證，因為得到HEPA就化表該空氣清新機型號可過濾出大小僅為0.3微米的顆粒。除了HEPA外，大家都仲要考慮CADR (Clean Air Delivery Rate)，即是空氣輸出比率，CADR愈高代表每小時可以由空氣淨化機排出的乾淨空氣量愈高。英國係邊度買空氣淨化機? 大家可以考慮去Argos，我地另外一篇文章都介紹過《Argos│英國百貨-手機電腦、電器、傢俬、家居用品、玩具遊戲樣樣齊》，大家有時間可以參巧。
圖1: 英國購買空氣淨化機, Argos
提升身體健康
最後嘞喎，容易敏感嘅人，往往都係身心唔夠平衡，日常做多啲運動，均衡飲食，懂得搵方法紓緩壓力，咁做幾時都無得輸啦！
Source: https://www.metoffice.gov.uk/…/seasonal…/pollen-forecast