移民英國，好多生活上嘅事都要從新適應，特別係處理垃圾嘅習慣嚟到英國就要好好重新學習，同香港不同，香港每日都有人處理家居垃圾，但英國一般都係一星期甚至兩星期先收一次。英國亦有部份嘅Council要求廚餘應該同花園垃圾（Garden Waste）一樣放係啡色嘅垃雜筒。但有部分就只係要求當一般家居垃圾放入黑色垃圾筒就可以。不過無論係掉入啡色垃圾筒定黑色垃圾筒都好，廚餘都容易產生異味，特別係夏天將至，炎熱嘅天氣會令廚餘更容易產生異味影響衛生。
之前介紹過大家係英國邊道買種子喺後花園種蔬果(英國花園 – 種出熟悉的味道)，但又有無諗過善用廚餘去幫後花園嘅植物去施肥呢？一來可以以環保方法有效處理廚餘，二來又可以為植物拖肥，增加收成，一舉兩得。
Table of Contents
堆肥桶
喺Wilko及B&Q等你都會見到有堆肥桶買。但主要係用嚟處理花園嘅枯葉和花草等，不過亦可以處理大家煮之前嘅菜頭菜尾同果皮等廚餘，留意重點係「煮之前」，可惜過程比較慢，同可以堆肥嘅種類限制比較多。
Wilko – https://www.wilko.com/en-uk/wilko-composter-220l/p/0507719
B&Q – https://www.diy.com/departments/composter-500l/1934695_BQ.prd
廚餘桶
如果大家有係花園種菜種花，廚餘桶會係一個好好嘅選擇，廚餘桶係利用生物降解發酵將廚餘分解，大約一個月左右就會有有機肥料可以用。廚餘桶需要配合專用廚餘粉協助廚餘發酵，發酵過程中產生嘅液肥都係好好嘅有機肥料。廚餘桶好處係價錢相對平，缺點係過程緩慢。
廚餘機
另一種嘅就係利用高溫烘乾處理嘅廚餘機，哩種廚餘機嘅好處係可以係幾小時內將廚餘嘅體積大大減少1/5甚至更少。哩類廚餘機的好處當然係處理廚餘嘅時間快，不過價格相對廚餘桶貴，而且相對耗電。可惜係英國似乎唔太流行哩類廚餘機。如果對哩類型廚餘機有興趣嘅朋友可以留意下Panasonic嘅MS-N53XD，哩部機內置兩種烘乾模式，低溫模式會將廚餘處理成方便用家用嚟堆肥嘅狀態，適合有種植嘅朋友。
「鐵胃」廚餘處理機
最後一種係稱為「鐵胃」嘅廚餘處理機，基本上就係將所有廚餘直接打成粉碎再沖走，有部分高效嘅甚至小型骨頭都可以處理到，不過大型骨頭或者蠔殼一般就需要額外處置。對於無種植嘅朋友，「鐵胃」可能係最好嘅選擇。「鐵胃」嘅好處當然係簡單直接，直接倒啲廚餘落去就攪掂，壞處係價錢相對貴，而且需要安裝。建議大家安裝前請先確認大家居所嘅喉管是否適合安裝，同向當地Council查詢是否可以安裝，因為2018年英國已經禁止商用嘅Food Macerators。
鐵胃運作影片介紹：
相關文章: