今日係同大家分享一個關於車，不過又唔關於英國買車驗車的悲傷故事，早前打開信箱，竟然見到隔離市 – Derby City Council寄嚟嘅信，由於編輯唔係住Derby，所以收到第一吓都有啲突然，之後就心知不妙。一開信果然係因違犯英國交通規則先會收到的Penalty Charge Notice（PCN）。話說收信前一星期去咗Derby，唔太熟路所以就跟Google Map導航行，點知唔為意行咗入巴士線專線自己都唔知。好彩今次唔駛扣分，否則就要開齋了!
Penalty Charge Notice（PCN）的內容及特別繳費條款
信上面會清楚列明事發地點同時間，仲會有埋CCTV Cap圖，所以都會唔錯得去邊。行錯巴士線承惠£60，28日內要繳交，過期要畀多50%即係£90，遲交要罰，但係原來早交就有Discount，14日內繳交就半價，真係好有鼓勵性同人性化嘅姐!
PCN是否刑事?
PCN係唔需要扣分亦無刑事記錄的，只係會罰款，只有Fixed Penalty Notice先會扣分及刑事，例如嚴重超速、酒駕及藥駕等等。英國司機其實都係0分起步，罰到12分就會停牌，停完之後可以再揸，不過唔同情況下罰分係會一路累積，不過計法有少少複雜，下次寫一篇文再分享。
交Penalty Charge Notice（PCN）罰款的方法
罰款大家可以揀用電話、上網或者親身去繳交。信上面都有教大家點做。我就選擇咗上網交，跟住信上面嘅網址去畀錢。就會出現下面個版面，大家揀返自己衰咗啲咩。
之後就會有一堆選項畀大家，其實哩度可以算係畀大家上訴嘅地方，大家可以揀返大家犯錯嘅原因Click返入去。有部份嘅原因係容許大家去
Challenge嘅，佢亦會講明Challenge嘅條件係點；亦有部分原因其實唔係Challenge嘅原因，好似我睇唔到個標誌嚟講就唔係一個原因咁就直接嗱嗱聲畀錢，罰少£30。
Google Map導航一般情況下都係無問題，我自己用咗咁耐都係第一次出事，但係提提大家，下次大家去到啲新地方除咗靠導航外，都要盡量靠自己望下啲路牌，今次就係過份依賴導航，所以出咗事。
英國買車揸車相關文章:
英國買車勿貪平 了解英國二手車 Write-off(報廢)Category