英國一年平均有23.7日落雪，大部分集中喺冬天12月至2月，雖然北部地區例如蘇格蘭落嘅雪比較多，但由於天氣潮濕，因此大部分英格蘭地區喺冬天亦都有唔少日子會落雪。喺chapter2英國生活無可能每逢落雪就唔出街留喺屋企，咁樣一對適合喺落雪日子或者雪地上行走嘅snow boots或winter shoes，無論對大人定小朋友都非常緊要。Chapter2朋友過去或者未有需要著到snow boots，今次就等我哋大家講吓買嘅時間要點揀啦！
講起snow boots要具備嘅功能，最多人諗到一定係要「防跣」，其實呢個只是其一個重要嘅功能。一對好嘅snow boots，起碼具備有另外5大功能，當然每個功能分別要做到幾好程度，視乎想著嚟行走嘅環境而定，例如係街道定郊外、平路定斜路、厚雪對薄雪等等，無話一定越勁越好，尤其是越勁通常代表越重，或者花更多功夫穿著，所以揀到最合適已經足夠。
「英國Amazon有唔少snow boots可以選購」 – https://amzn.to/3DIKlfj
Table of Contents
防跣
英國每年有唔少意外，係喺雪地上行走跣親跌斷手腳，所以話「防跣」絕對係snow boots最緊要嘅功能之一。要睇一對snow boots嘅「防跣」能力，首要當然睇個鞋底(shoe sole)。如果鞋底坑紋越深和越多，理論上「防跣」能力越高，但其實亦都要留意坑紋嘅方向，假設向前後行嘅方向叫「打直」，「打橫」嘅坑紋可以防止向前後跣親，但喺雪地上行，都可以「打橫」向左向右跣親，咁就要靠「打直」坑紋。換句話說，好嘅snow boots，鞋底坑紋最好縱橫交錯。
不過如果你需要喺比較厚雪嘅地面上行，坑紋嘅「防跣」能力或者已經唔夠用，咁就要睇snow boots鞋底有幾「凹凸」，道理有少少似踢足球草地波boots，或者田徑跑道用嘅釘boots。鞋底「凹凸」嘅snow boots踏上雪地時，雪會進入啲「凹位」，而「凸位」會插入啲雪度，幫手抓住個地下，效果比只有坑紋更佳，唔會咁跣。
防水
Snow boots另一個重要功能係防水，試諗下如果有雪留咗喺鞋面，可能因為腳面體搵或者去到室內比較暖嘅地方，慢慢融化而入到去鞋籠，整濕對襪，係幾咁辛苦嘅事呢？Snow boots嘅鞋底通常比較厚和用膠製造，因此通常都不太擔心會入水，反而要睇鞋身和鞋底嘅接駁位，有無用到防水嘅方法，以及鞋身嘅物料係咪防水或者中間加入咗防水層。
另一個snow boots要留意防唔防水，比較多人忽略嘅地方，係鞋筒嘅高度，要幾高就視乎你行走嘅雪地有幾厚。試想想如果係厚雪，而你對snow boots鞋筒只係到腳眼高少少，雪分分鐘由鞋筒跌入鞋籠，到時都咪話唔凍！另外亦要留意鞋筒頂部有無用繩、鞋帶或扣等來收緊嘅功能，亦可以防止雪跌入鞋籠。
保暖
唔需要解釋點解snow boots要保暖啦，幾保暖視乎鞋身用咩布料以及有幾厚，但唔好忽略鞋底嘅厚度同埋鞋墊有無用絕緣物料，因為寒氣往往由腳板底直上，咁先係最凍！不過有時靠睇又好難估到對snow boots確實有幾暖，喺度介紹你睇兩個數據，分別係snow boots嘅「temperature rating」以及「insulation rating」。大部分snow boots經過實驗室測試，提供呢兩個數據，所謂「temperature rating」即係穿著住對snow boots可以喺幾低溫度仍然保持對腳掌溫暖。例如一對snow boots「temperature rating」係「-20°C」，即係話佢係「-20°C」環境，理論上仍可保持腳掌溫暖。一般snow boots「temperature rating」有「0°C」至「-60°C」，但係建議為求舒適唔好去到咁盡，加返10°C至15°C最好，即係如果一對snow boots嘅「temperature rating」係「0°C」，10°C至15°C天氣著就最合適嘞。
至於「insulation rating」，即係一對snow boots用上幾多絕緣物料，以「grams(g)」為單位，snow boots一般分為100g至600g，通常鞋公司話100g等如「temperature rating」嘅「-10°C」，即合適喺-10°C環境穿著。
保護能力
喺雪地上行除咗跣之外，亦有其他危機，因為你唔會知道雪下面嘅地面，究竟係唔係凹凹凸凸、有無高低級、有無石頭，甚至有無釘等尖物，所以snow boots嘅保護能力千萬唔好忽略。可以分為三方面睇，首先係鞋筒夠唔夠高和硬，包裹腳跟緊唔緊，以預防「拗柴」；第二係鞋頭，有無比較堅硬嘅板，防止踢到石頭或其他硬物，保護腳趾；第三係鞋底硬度，萬一唔好彩雪下面有釘、鐵片等尖利物件，都可以確保唔會割到腳底。
喺雪地上玩其實樂趣多多，但最緊要有合適保護，祝chapter2朋友有個安全和愉快嘅冬天！
去邊買Snow Boots好?
記唔記得我地之前有一篇文章 – 英國防水外套品牌介紹，當中大部份戶外用品品牌及店舖都會有得賣Snow Boot，所以如果想睇詳細介紹，就請移玉步到果面睇睇，當中包括:
Go Outdoor
網站: https://www.gooutdoors.co.uk/
Cotswold Outdoor
網站: https://www.cotswoldoutdoor.com/
Black
Mountain Warehouse
網站: https://www.mountainwarehouse.com/
Regatta
Rab
Berghaus
Craghoppers
網站: https://www.craghoppers.com/
Jack Wolfskin
網站: https://www.jack-wolfskin.co.uk/
The North Face
網站: https://www.thenorthface.co.uk/
Decathon
網站: https://www.decathlon.co.uk/
Columbia
網站: https://www.columbiasportswear.co.uk/
Timberland
網站: https://www.timberland.co.uk/
Patagonia
網站: https://eu.patagonia.com/gb/en/home/