大家可能會好奇怪，嚟到英國一般住嘅地方大咗，好多時仲要有車房，點解仲要介紹迷李倉呢？ 其實有部份初到英國時，未有一個長期嘅落腳點，有啲可能只係搵到短期租約、有啲可能暫住朋友家、有啲可能租緊AirBNB、有啲朋友可能買咗樓未收到樓。但係大家嘅家檔可能係離港之前已經寄出咗，但係過到嚟可能搵屋唔順利，收樓時間比原定嘅長，導致大家嘅家檔嚟到英國但係都未有一個長期居住點，但大家可能礙於唔想收完家檔又要搬多次，又或者暫住嘅地方比較細放唔落所有嘅家檔，哩個時候就真係可能需要迷李倉嘅幫助。
今次就想同大家介紹兩個網站 – 全英最多儲物點的Safestore 及集中服務於London的EasyStorage。使用方法好簡單，兩個網站都係打個Postcode 就可以搵到最近嘅迷李倉位置，價錢就因應大家嘅需要嘅迷李倉嘅大小、地點及服務而有所不同。要留意大部份迷李倉提供紙箱係需要額外收費的。
Safestore
Website: https://www.safestore.co.uk
Trustpilot: 5,484條評論, 4.8/5分
全英有129個儲物點，當中倫敦佔49個，做資料搜集時搵唔到有一間多過佢，所以應該係全英國最多儲物點的迷李倉公司。Safestore可以選擇儲存倉嘅大細選擇比Easystorage多，由最細嘅10 sq ft 到 最大嘅500 sq ft總共有12個尺寸，而且價錢相對平啲。當中以25 sq ft倉最受歡迎，以Nottingham作為Quote價地點，一個月收費Standard Price係£27.21，不過新客有優惠頭8個星期半價，要留意Safestore係需要自行入倉、自己準備鎖頭，而且以上費用不包括保險，保費就係要睇你存倉物品價值而決定。倉入面有手推車、板車及剷車(收費)可以借用。Safestore 同時亦提供商用、學生、傢俬等等嘅倉儲服務。
EasyStorage
Website: https://www.easystorage.com
Trustpliot: 1,893條評論, 4.8/5分
EasyStorage主打上門收貨及送貨服務，唔駛特登揸車去個倉。服務嘅範圍不及Safestore咁覆蓋全英，不過倉嘅數量就好多，但係主要覆蓋敦倫同周邊範圍，以及Manchester 及西北部份地方，住Midland嘅朋友就可能用唔到EasyStorage嘅服務喇。EasyStorage可以選擇儲存倉嘅大細相對比較少，最細只有35 sq ft，最大亦只有210 sq ft。以35sq ft倉為例，一個月收費Standard Price係£78。留意EasyStorage係唔可以自己入倉的，需要最少早2日安排收貨(包Loading一次性收費)及送貨，另外EasyStorage唔需要自備鎖頭，但係Insurance都係要分開購買，會係Quote價時清楚列明。雖然2間公司都係做迷李倉，不過雙方定位同服務完全不同，EasyStorage價錢貴唔少，但係佢提供嘅Collection & Return 服務，如果平時無時間去倉依個服務就適合你依個大忙人喇。
