生活難免有時遇到危急突發或自己處理唔到嘅情況，呢個時間當然要識得求助。嚟到英國展開chapter2生活嘅朋友，除咗要記住「999」呢個英國緊急電話，同以前一樣喺危急情況可以報警或召喚救護車之外，亦應該要知道另外三個電話號碼「111」、「101」和「112」，分別喺唔同情況下，例如有醫療需要或想警察幫手，可以搵到人求助。究竟呢幾個電話號碼應該分別喺咩情況下撥打呢？今次等我哋為大家講吓，等大家有需要時可以快速求助之外，亦唔會濫用有關服務啦！
Table of Contents
英國的「999」
英國濫用打電話「999」服務嘅情況，其實亦都算嚴重，當局曾經公布一啲個案，有人連唔記得將雞蛋放入雪櫃後究竟食唔食得、想搵人幫手換膠布、唔想等30分鐘做手術想轉去其他醫院等等，都打「999」求助。知道清楚咩情況下先應該打「999」，可以避免阻到真正有需要嘅人，真係分分鐘幫助拯救到生命。其實喺英國應該咩情況下打「999」，與喺香港幾乎大同小異，包括：
- 有緊急醫療需要，例如出現嚴重病徵或受傷，生命受到威脅
- 有火警發生
- 正在發生罪案，例如襲擊或爆竊
簡單嚟講，喺英國打「999」可以召喚到救護車、消防和警察，請在有真正緊急需要時先好用，千祈唔好浪費資源。
英國的「111」
與「999」服務不同，如果有需要獲得醫療建議或治療，而又不屬於緊急情況，可以打電話號碼「111」。呢個電話由受過專業訓練的人士會負責接聽，並由護士和藥劑師喺背後支援，對方會詳細問及你嘅身體狀況和病徵，提供可行的協助。應該打「111」嘅情況例如：
- 需要快速醫療協助，但不屬於緊急情況
- 認為需要住院治療
- 沒有可聯絡嘅醫生或手術時間已過
- 需要醫療建議，但不知道怎樣做
即使你想去醫院急症室，出發前亦可以考慮先打電話「111」，因為佢會幫你通知急症室你可能到達嘅時間，等佢哋有所準備，你去到輪候時間亦有可能縮短，所以都值得咁做。「111」服務另一個值得留意嘅地方，係可以提供翻譯服務包括中文，要知道有時身體狀況或病徵，未必可以用英文好準確咁交代，萬一遇到呢個情況，翻譯服務可以幫到手。
〈圖1〉
英國嘅「111」服務星期一至日每日24小時都運作。有人或者會問，點解呢個服務咁好，又唔使錢呢？其實呢個英國嘅「111」服務，係由英國公營醫療系統National Health Service (NHS)提供，換言之由公帑支助，目標除咗提供醫療服務俾公眾，亦希望減少「999」服務嘅壓力。「111」服務除咗電話之外，亦可以喺網上去到呢個網址https://111.nhs.uk/ 尋求協助。
英國的「101」
如果你唔需要警察立即到場，但希望向警方報案或提供罪案嘅資料，應該打呢個電話「101」。要留意係打「101」，唔理通話有幾長，每次通話收費為6至7仙英鎊，象徵式收費目標都係唔想人濫用。但千萬要記住，如果罪案正在發生或有人生命有危險或受威脅，不要猶疑打「999」，而唔係打「101」。
「112」
呢個電話號碼「112」無論喺英國、歐盟國家以至世界大部分地方，都係作緊急求救之用，即使手提電話顯示為無網絡訊號，打「112」仍然可以接駁到當地嘅緊急求助系統，喺英國亦即係「999」。去到英國地方大，享受郊遊樂趣，都要僅記呢個號碼，有需要時求助！