真人真事 – 有個朋友，剛剛搬到去英國生活，展開chapter2。佢租咗間house打算住一兩年睇吓適唔適應，間屋有個唔算好大四百幾呎嘅花園仔，因為一段時間無人打理，生哂雜草堆滿枯葉枯枝。我朋友就自己落手落腳清理，買埋泥種返啲植物，搞個花園「靚靚仔仔」。佢將掃走嘅雜草枯葉枯枝「放」喺屋外馬路旁一個公家草地上，大約半個人咁高，方圓一米左右啦，無阻住任何人架，諗住又唔係啲人為垃圾，擺幾日睇吓再點搞啦，結果過兩日Council架垃圾車嚟收垃圾，無收走不特止，之後一日鄰居拍門，提醒我朋友快啲處理埋雜草枯枝，如果唔係最嚴重嘅情況可能會被會被罰錢架。
其實初初去到英國生活展開Chapter2，無論租樓或收樓(我哋一向鼓勵投資先買樓，自住不妨先租架吓！)，除咗好似我朋友整理吓個花園，難免亦買吓新傢俬電器，要掉走啲包裝紙皮，同埋要掉埋啲被取代嘅舊物品。我哋講過喺英國生活，處理垃圾係需要成本嘅 (唔記得就睇返我哋篇文(https://hkersuklife.co.uk/18/01/2021/daily-life-2/3074/)，House每戶一般只獲Council分發兩至三個收不同類型垃圾嘅垃圾桶，Council一星期派車來收一至兩次垃圾。如果垃圾桶唔夠裝，向Council申請多個要俾錢。住Apartment就要同鄰居share垃圾桶，容量更加少。千祈唔好就咁擺垃圾桶隔離呀，要罰錢架！罰金由幾十至幾百鎊！唔介意罰錢都好，俾鄰居神憎鬼厭亦都好麻煩！咁有咁嘅大型垃圾點算好呢？一係自己車去垃圾收集中心(要留意可能要約時間)，亦可以聯絡當地Council派車嚟收，不過唔係度度Council有提供呢個服務，就算有收費通常都「乸脷」，時間亦好無彈性。其實英國有好多私人公司，專門幫人處理，經濟實惠好多，而且可以揀個啱自己嘅服務，等我哋話你知。
講到呢啲係英國提供處理垃圾服務嘅公司，一定要介紹Hippo Waste，非常方便，你網上輸入住址postcode，就可以知道要收大約幾錢同埋做預約，佢有三種方法收集你嘅垃圾：
- Hippobags – 用佢提供堅韌可以裝到好重嘢嘅大袋，裝哂要棄置嘅廢物，然後由佢安排吊雞車運走
- Man and Van – 佢派人同van仔來幫你清走堆好嘅廢物運走
- Skip hire – Skip其實即係我哋叫嘅「環保斗」，佢哋將個skip放喺你屋企附近，你裝滿後佢運走。
用Hippobags真係非常方便，唔好睇小呢個袋，佢有3種size，可以裝到噸至1.5噸重量，價錢約由£150至£260。最好係你落order後通常第二日就會運個袋俾你，你唔使即刻執垃圾出來前，個袋可以摺埋先唔使阻住地方，變相你幾時執垃圾出嚟嘅彈性好大，到你執完就可以約佢哋嚟吊走袋垃圾。至於Man and Van亦都好方便，你將垃圾堆好，然後放喺自己地方，佢哋會派人來收走。
最後特別講吓skip，係英國用來處理大件或大量垃圾，容量比較大，對於剛搬入新屋，要添置好多家俬電器，有好多大型垃圾嚟，有時Hippobag最多裝到1.5噸垃圾，真係唔夠用，用skip就比較化算，而且好就好在佢可以放個skip喺你屋企附近幾日，你咪唔使一次過執哂啲垃圾出嚟，可以分幾日拎啲垃圾出嚟填滿佢，先叫人嚟拖走囉(越多日數有機會收費越貴)。唯一要留意係，你屋企附近有無位放個skip，唔好阻住人惹人投訴，不過英國相對較大地方，一般都有咁嘅空間位置。
想知道Hippowaste呢三種收集垃圾服務嘅分別，最好上佢個網睇吓條片 – 傳送門(Click我)。
另外其實英國有好多提供skip處理垃圾嘅公司，想用skip又想格吓價，俾多個網頁你https://skiphirecomparison.co.uk/，只要輸入住址postcode就可以幫手格價，邊間skip公司收費最抵。
最後介紹多間處理垃圾公司 Skoup https://www.skoup.co.uk/ ，佢同樣有三種方法收垃圾 Van it / Skip it / Bag it，用法一樣係網頁輸入你個postcode，就會列出哂呢三個方法嘅收費，以Birmingham B5區為例：
Van it : 四分一架van (200kg) £75 ; 半架van(400kg) £130 ; 成架van £185
Skip it：Mini 50個垃圾袋(最重2噸) £240；Midi 70個垃圾袋 (最重2噸) £275；Maxi 100個垃圾袋 £321
Bag it：5個垃圾袋(等如一個垃圾桶) £10；10個垃圾袋 £20 ；20個垃圾袋 £40
與Hippo Waste最大分別，係Skoup無提供類似Hippobags嘅自家袋，用bag it只能用一般垃圾袋，按垃圾重量比例嘅收費嚟講，未必最化算。
快啲快快手手搞掂個家園，享受英國chapter2生活啦！