「Give Blood , Save Lives」、「Just an hour of your time can save or improve up to 3 lives」 呢啲都係喺英國呼籲人捐血廣告嘅口號，就好似當年「搭小巴去捐血，揸賓士去捐血，步行或者揸架的士去捐血」咁深入民心。事實上血液並無代替品，無論香港定英國，每日都有唔同嘅病人需要接受輸血，所以持續有人捐血非常重要。好多人都有捐血嘅習慣，嚟到英國展開Chapter2，等我為大家講吓喺英國點樣捐血啦！
Table of Contents
捐血的好處
我有個朋友，18歲開始已經有捐血嘅習慣，後嚟大個做咗醫生，都繼續保持呢個習慣，到宜家已經十幾廿年，香港嚟講18歲以上男性，相隔大約十個禮拜就可捐一次血，佢會每兩至三個月相隔夠期後就再去捐血。佢分享話唔覺得自己好偉大，只係覺得幫到就幫，如果遲咗去捐血個心會囉囉攣。同埋佢話捐血過程一啲都唔辛苦，捐完仲覺得自己健康咗添。的確係有研究話，捐血有好處包括降血壓、有益心血管健康、保持體內鐵質平衡等等，咁我呢個朋友健康的確都唔錯。
英國的捐血服務
英國嘅收集血液工作由National Health Service(NHS)負責，NHS即等如香港嘅衞生署同醫管局嘅混合版，由稅收支付營運，為全民提供醫療服務。喺英國捐血最好上佢哋個網頁先登記，網址係
登記嘅過程須要填寫年齡(要夠16歲)、體重(要夠50kg)、過去有無接受過輸血或患癌等資料，佢亦會問你屬於咩種族，只係建議要填寫但唔一定要填寫，因為唔同種族嘅血液成份有啲唔同，填寫方便醫護人員用嚟分開，將血液用於類似背景嘅人身上。登記完成後就可以揀捐血嘅地點，然後預約捐血嘅時間，全英國有過千個可以捐血嘅地點，部分係流動或臨時中心，方便住得遠嘅人，簡直係話梗有一個喺左近。
BNO Visa資格可唔可以捐血?
有人會問拎住BNO Visa可唔可以捐血呀？當然絕對無問題，只要身體健康，身體條件符合捐血要求就可以。英國當局更加係非常歡迎，有亞裔背景嘅人捐血添，始終新加咗多來人口，都需要多啲捐血嘅人應付需求。NHS最近亦開展咗個Campaign叫「Heart to Heart」，同英國最大嘅不同族裔食物入口商Tropical Sun合作，喺一啲食物例如米嘅包裝上，印上鼓勵捐血嘅廣告，鼓勵亞裔人捐血添。
英國捐血流程
捐血前建議食啲野同飲足夠水份，根據預約時間去到捐血嘅地點後，過程其實同喺香港近乎一樣，先填寫問卷，然後醫護人員會同你傾計問吓你狀況，目的都係評估你係咪適合捐血，跟住落嚟測試血紅素水平，都符合要求就等嗌名，進行抽血嘅過程，呢個程序只需要5至10分鐘，之後有位俾你休息吓同享用吓refreshment，成個捐血程序大約一個鐘啦。
COVID19 下的捐血安排
COVID19疫情下，英國嘅捐血服務如常運作，即使lockdown緊都可以去捐血。不過當然採取咗防疫措施，例如進入捐血中心要量體溫戴口罩等。留意返NHS例明呢啲情況下唔可以捐血，例如有發燒、無嗅覺等病徵、須自我隔離期間或者同住嘅人要自我隔離、曾經接觸確診者、正在等候病毒測試結果等等，接種咗疫苗就要等七日先好捐血，曾經感染新冠病毒，就最好要無哂病徵等多28日後先好去捐血。